Aizawl: August 27, 2020-a Village Council inthlan lo awm turah khaw 15-ah chuhtu awm lova thlan tlin an awm tawh a, hengte hi MNF khaw 12 leh Congress khaw 3-ah an ni.

Chuh lova MNF VC tlinna hi Lunglei district-ah Kawlhawk (reserved seat) leh Sethlun te an ni a, Thehlepah Congress chu chuhtu awm lova thlantlin an ni. Champhai district-a MNF tlinna hi Ruantlang Mualveng leh Vangchhia (reserved seat) te an ni a, New Hruaikawn ah Congress an tling.

Mamit district-a Bekabery (Lianbuang), Chhippui II, Hruiduk, Phuldungsei Zampui leh Serhmun West ah te MNF chu chuhtu awm lovin tlinga puan an ni a.

Saitual district-a Lenchim khuaah MNF, Khawzawla Tualte (reserved seat)-ah Congress te chu chuhtu awm lova tlinga puan an nih bakah Hnahthial district-a VC pahnih Hniahthial III leh New Kawnpuiah te chuan MNF chu chuhtu an awm lo a ni.