Aizawl : ZLP Legislature Party Leader Lalduhoma chuan Mizoram sawrkar chu PCR khawl lei vat turin a duh thu a sawi a, state sawrkarin khawl pakhat chauh a neih lai khan pek a tum thu sawrkarah hian a thlen tih leh ngai an tih lo thu in an chhang tih a sawi a, Covid mamawh apiang leina tur sum pe zung zung tur leh damlo apiang tana pek tur Rs 2 lakh chu Covid natna veite hnenah pe vek turin Finance Minister a ngen bawk.

PCR pakhat chauh an neih laia a mimala khawl pek mai a tum chuangchang a sawinaah Duhoma chuan, "Test tur a tam si a, PCR khawl pakhat chauh hawh chawp lehnghal ringa State Sorkar ve lem a awm chu a fela ka hriat loh avangin June ni 1 khan, leia pek ka duh thu sorkarah ka thlen a, a ngai an tih loh thuin chhan ka ni a, mak ka ti hle," tiin a sawi.

ZMC hi hriat theuh angin Medical College puitlinga pawm a la ni lo va, a khat tawkin Medical Council of India chuan a rawn endik reng a, paltlang tur tamtak a la awm. College puitling ni tur hian VRD (Viral Research Diagonistic) laboratory neih ngei ngei a ngai a. PCR hi VRD Laboratory hian a keng tel a ni. Tuna mi ta kan hawh khawl 2 te hi chu pekkir a la ngai dawn a, Sample Test nan leh College puitlinga pawm kan nih theih nan PCR khawl kan neih vat hi tihmakmawh a ni, tiin Duhoma chuan a sawi. "March thla atang tawh khan PCR khawl lei tum thawm hi hriat a ni tawh a. June ni 2 khan Pu Thantluanga'n a leina tur Rs 21 lakh a pe bawk a. Chuvangin sorkar hian hun khawhral tawh lovin lei vat se a lawmawm ngawt ang," tiin PCR khawl lei hi hmanhmawh thlak a tih thu a sawi bawk. Mizoram sorkar hian PCR khawl dang hi, IBSD, Imphal atangin a hawh belh a, June ni 7 atang khan khawl 2 kan hman tan a ni.

Duhoma hian Covid 19 hri control thei te chu Rt-PCR te, RNA Extractor te, TRUENAT te, RAT te, PPE leh a dang te an neih that vang niin a sawi. "Keini pawhin heng khawl kan mamawhte hi a hun takah nei zel ila chuan harsatna tamtak kan pumpelh ang a, hri inkaidarhna kawngah pawh kan ziaawm phah hle tur hi a ni a. February thla tira Health Minister-in Rs 132 lakh a dil te kha hnawlsak ni lo se chuan test ngai ho hi chu kan test zo thei vek tawh tur a ni," a ti.

June 10, 2020-a Twitter Web App lama a lan dan chuan, Mizoramin a test tawh hi mi 2747 chauh an la ni a, India ramah test nei tlem ber kan ni, a ti a, "Khawl lei kawngah te, sample test kawngah te a vuaicha ber kan ni. Revenue Defecit Grant kan dawn tur Nuai 11850 pawh a hun takah thlatin kan dawng zel a, June thlaah pawh kan dawng leh tawh a. Tangkhangte buaipuina tur pawh PM CARES Fund atangin June ni 9 khan kan dawng bawk," tiin, "Finance Minister hi, ama tawngkam ang ngeia mamawh apiang leina tur sum pe zung zung tur leh, damlo apiang tana pek tur Rs 2 lakh a dah kha Covid natna veite hnenah hian pe vek turin ka ngen bawk a ni," tiin a sawi zui bawk a ni.