India-a Women & Child Development Ministry chuan ram chhungah naupang 10,000 chuang an nu leh pate nen khawlaia khawsa an awm mek tih a sawi.

Zirtawpnia Lok Sabha thutkhawmah zawhna chhangin Women & Child Development Minister Smriti Irani chuan Bal Swaraj portal-a chenna in nei mumal lova khawlaia khawsa naupang zat hi a sawi a ni.

Chhinchhiah a nih dan chuan naupang 19,546 zet khawlaia khawsa an awm a, an zinga 10,401 chu an chhungte nena khawsa a ni a. Naupang 8,263 erawh chu chhun lamah chauh khawlaiah khawsain zanah chuan mi rethei awm khawmna vengah hawin an nu leh pate nen an awm nia tar lan a ni.

Khawlaia cheng zinga naupang 882 chu nu leh pa leh chhungte dang pawh nei lo, anmahni awm awma awm an nih thu tar lan a ni bawk.