ZALEN March 10, 2025 : Vawiin khan Old Secretariat Building-ah Lalmuanpuia Punte Adviser to CM chuan a bial chhung Khawlailung Primary Health Center - a hman turin Ambulance a hlan a, Dr. Vanlalhruaii Medical Officer chuan PHC, Khawlailung aiawhin a dawng.

Lalmuanpuia Punte Adviser to CM leh Hrangturzo Bialtu MLA ni bawk chuan thusawiin, "Hmasawnna chak takin kalpui duh mah i la harsatna neuh neuh lo awm thin avangin duh angin a chak thei lo thin a, a tahtawlin mipui mamawh leh kuthnathawktute khai chhuak turin kan Chief Minister thahnemngaihna in tih hlawhtlin chhoh mek zel a ni. Khawlailung PHC hian tehna paltlang ngai 'IPA' a tlin theihna tur atan Ambulance an mamawh a, chumi avanga pek an ni. Hrangturzo bial mipui pawhin a zar kan zo zel ang a, mi ngaih ah chuan thil ropui tak ni lo mah se, mipui mamawhna anga hma laknaah sawrkar nen tangkawpin a zar kan la zo zel pawh ka beisei bawk a ni," a ti.

H Lalengmawia Health and Family Welfare Comissioner pawhin thu sawiin "Hrangturzo Bialtu MLA in a bial chhung mamawh inthlahrung tak chunga a hlan hi a ropui ka ti hle a, Mizoram sawrkar hian hriselna hi a ngai pawimawh em em a, chung ang hmalakna hmuh theh a ni pawh hi lawmawm ka ti hle a ni. Mizoram leh Central-in Healthcare system tha tak kan nei te hi a hlawhtlinna tur chuan sawrkar Hospital mai ni lo mimal Hospital pawimawhna te pawh hi a sang zel dawn a ni. Thiltha min tihsak tute chungah lawmna chang hria i la, finchhuah zel bawk i la, thil tha ti tute chawimawi hi Pathian duh dan pawh a niin ka hria," a ti bawk.