Aizawl : Sawrkar laipui lamin boruak thianghlim lo tih tlemna atana hma a lakna kal mekah state tin ten subsidy-a khawnvartui an lak thin chu a kum telin tih tlem tial tial a ni a, Mizoram khawnvartui dawn pawh a tlahniam chak state zingah a tel a, reilo teah subsidy Khawnvartui hi Mizoramah hian tawp thei dinhmunah a ding.

Central sawrkar flagship programme-a energy schemes Pradhan Mantri Ujjwala Yojana (PMUY) leh Saubhagya hnuaiah khawnvartui hi a tlem thei ang ber hman a nih theihna turin hmalak mek a ni a, state tam tak subsidy hi nasa taka tih hniam a nih laiin state tam tak chuan an mamawhna avangin tih hniam hi an duh lo a, central lamah pawh an thlen hlawm. Hetihlai hian Mizoram sawrkar erawh chuan mamawhna a la san ngaihtuahin central lamah hian tihhniamna ti tlem tur hian hmalakna tak tak a la awm lo niin, ZALEN chuan thu a dawng.

North East state zingah pawh Sikkim tih lovah chuan Mizoram hian Khawnvartui hi a dawng tlem fal hle a, dealer lam pawhin mipui phuhru khawp phurh tur an nei lo tih thu an sawi a, Aizawl bikah hian Khawnvartui mamawhna hi tam tawh lo mah se, thingtlang lamah chuan mamawhna a la sang hle niin an sawi bawk. "Aizawl lamah chuan a mimir ang chuan hmanna kan ngah tawh lo a ni mai thei, mahse, thingtlang lamah, Gas mumal lohnaah chuan Khawnvartui bak hi innghahna tur a awm rih chuang lo, sawrkar hian kan subsidy tih hniam zel hi a ven a ngai a ni," tiin Khawnvartui dealer pakhat chuan ZALEN a hrilh.

Khawnvartui hrim hrim hi subsidy a pekchhuah a ni a, duh zat zat lakluh ngawt theih a ni lo a, hetihlai Mizoram hi hmarchhak state zingah pawh a dawng tlem ber pahnihna a ni, thenawm state te dawn chanve pawh Mizoram hian a dawng lo. State dang te dawn pawh hi a tlahniam ve reng tho bawk. Chutihrualin state lian tam tak chuan central lamah khawnvartui an la mamawh nia an inchhal avangin an quota dawn hi a tlahniam tam lo thung, BPL dinhmuna kan state dinhmun ngaihtuah leh mipui mamawhna ngaihtuahin dealer lam chuan Khawnvartui kan hmuh tlahniam zel hi kan tawrh phah thei niin an hria.