Premier League Champion Manchester City chairman Khaldoon Al Mubarak chuan, season thar atangin Erling Haaland chu an mi leh sa a nih tawh tur thu leh inremna pawh an neih pui tawh thu a sawi a, khawvel no. 9 tha ber Haaland an kawl tawh chung pawhin tun nipui transfer chhung hian player dang tha tak tak lak luh belh an tum thu a sawi bawk. 

Haaland hian Borussia Dortmund atangin £51million zetin Premier League champion hi a zawm dawn a, kum nga daih contract an ziak ang. Al Mubarak chuan club leh Haaland-a chhungte inbiakna a kal fuh em vangin, amah lei tuma dawrtu club dang aiin an tlak nat phah niin a sawi lang bawk. 
"Tunah khawvel no 9 tha ber kan nei tawh a, a kum pawh duhthusamin a la naupang bawk. Haaland-a telna team hian kan daih rei dawn a, kan hma hun lo awm tur kum 10-15 thleng kan daih mai thei, kan hma hun atan striker tha tak kan invest a ni," tiin Al Mubarak chuan Haaland an chang thei chu vannei a intih thu a sawi.  

Sawi zawmin,"Mi danglam bik, striker talent nei tha tak a ni a, khawvel-in an thlir mek a ni. Team lian zawng zawngin lak luh an duh laiin Manchester City a zawm duh a, kan chang hlauh hi kan vannei tak meuh meuh a ni. Fans lam nen pawh inpawhna tha tak an nei ngei ka beisei," a ti. 

City hian central midfiel thuam chak nan player thar an melh deuh a, chung zingah chuan Leeds United lama khel Kalvin Phillips leh Matheus Nunes-a Sporting Lisbon duhlai te chuan an mit a la hle niin an sawi. Left back rinawm Brighton player Marc Cucurella leh Arsenal tana khel mek Oleksandr Zinchenko te chu an beisei zingah an tel bawk. 

Al Mubarak chuan,"Kan chak lohna thuam chak turin player thar kan lak belh ngei dawn tih chu ka tiam ngam. Season tin hian player lut chhuak an awm ve reng a, kan inthlak danglam ve deuh hi a ngai thin a ni," a ti.  

Guardiola hian City hi season sarih chhung a enkawl tawh a, tunah hian Etihad lama cham tur hian kum khat dang contract a la nei bawk a, mahse a hma hun sawi chian engmah an la nei lo thung. Hemi chungchang hi Al Mubarak chuan sawiin,"Pep Guardiola'n contract thar chungchang sawi a inpeih hun hun club lam chuan kan nghak thei. Kan club aia rei club dang enkawl a la nei ngai lo va, Barcelona leh Bayern Munich lama a cham airei a cham tawh. Thawhpui nuam kan ti em em a ni," a ti.