World Population Review (2019) in a tarlan dan chuan khawvel ram hrang hrang zingah Czech Republic chu zu in nasa ber ram an ni a, Latvia chuan an dawt. Zu tih hian beer leh zu kaihhnawih thil siam chi reng reng a huam a ni. 

World Health Organization (WHO) in a tarlan dan chuan Czech Republic ram mipuite hian kum khatah mi pakhatin zu (alcohol) liter 14.26 zel in ang an ni a, khawvelah a sang ber an ni. Czech Republic-ah hian mihring maktaduai 10 chuang awrh chauh an cheng a, ram lian an ni lo. Mahse zu lamah chuan an intodelh viau a nih hmel a, mi pakhat in ral pawh tam tham tak a ni. 

Latvia leh Moldova te chuan an dawt a, mi pakhatin kum khat chhungin liter 13.19 leh 12.85 zel in ang an ni. Germany pawh a sang zingah an tel a, mi pakhatin liter 12.79 zet chu kumtin in ral anga chhut an ni. Lithuania (12.78 liter) chu top 5-ah an lang bawk a, Ireland leh Spain te an langsar viau bawk. 

Anni bakah hian Uganda, Bulgaria leh Luxembourg te chu zu in tam ram 10 zingah an tel bawk. Top 10-ah hian khawvela ram ropui ber USA an lang lo a, 39-na an ni phak tawk. Kum khat chhunga mi pakht zu in ral zat chu liter 9.97 ang zel a ni - khawvel ram hrang hrangte zu in zat chawhrual liter 5.8 ai chuan a sang hle. 

Zu in tam ram top 10 
(Kum khat chhunga mi pakhat in zat)
1. Czechia - 14.26 liter
2. Latvia - 13.19 liter
3. Moldova - 12.85 liter
4. Germany - 12.79 liter
5. Lithuania - 12.78 liter
6. Ireland - 12.75 liter
7. Spain - 12.67 liter
8. Uganda - 12.48 liter
9. Bulgaria - 12.46 liter
10. Luxembourg - 12.45 liter

Zu in tlem ramte
Zu in tam ram leh in tlem ram te hi kum khat chhunga an in ral zat a inthlau rem rem hle. Somalia, Bangladesh, Kuwait, Mauritania leh Saudi Arabia te chu khawvela zu in tlem ber ram an ni a, mi pakhatin kum khat chhungin liter 0.013 chauh in ang an ni! Afghanistan, Libya, Yemen leh Egypt ten an dawt a, Syrian Arab Republic leh Bhutan te pawn an in tam lo hle. 
Zu in tlem ram zingah hian - Indonesia, Pakistan leh Djibouti te an lang bawk. 

Zu in tlem ram top 10 
(Kum khat chhunga mi pakhat in zat)
1. Somalia, Bangladesh, Kuwait, Mauritania, Saudi Arabia 
2. Afghanistan - 0.013 liter
3. Libya - 0.027 liter
4. Yemen - 0.034 liter
5. Egypt - 0.14 liter
6. Syrian Arab Republic - 0.19 liter
7. Bhutan - 0.21 liter
8. Indonesia - 0.22 liter
9. Pakistan - 0.31 liter
10. Djibouti - 0.36 liter