Aizawl September 7, 2023 : Vawiin khan Deputy Chief Minister leh MNF Sr. Vice President ni bawk Tawnluia chuan Khawzawl Zuchhip Venga Deputy Commissioner of State Tax Office chu a hawng, vawiin vek hian Government Khawzawl College Academic & Warden/Staff Building a hawng bawk.

Tawnluia chuan Khawzawl District-in Deputy Commissioner of State Tax Office-a nei thei ta chu lawmawm a tih thu a sawi a. Taxation Department chu sawrkar tana sum la luttu department pawimawh tak a nih angin, sawrkar pawhin a ngaipawimawh a ti. Sawrkar kum liam ta 2022-2023 chhunga cheng vaibelchhe 1020 zet chhiah an la khawm thei chu ropui a tih thu a sawi.

Tawnluia chuan mipuite harsatna turin sawrkarin chhiah khawn a tum lo thu sawiin, dan awmsa hnuaia chhiah tha taka pek erawh khua leh tui tha te awmdan tur a ni a. Mizoram sawrkar chuan mahni kutkawih ngeia intodelh tumin, hemi kawnga mumal zawka inrelbawlna kalpui nan Resouce Mobilization Department thar a din thu pawh he hunah hian a tarlang.

Dy. CM hian Government Khawzawl College Academic & Warden/Staff Building hawnna hun a nei nghalin, College building phuisui tha tak an nei chu lawmawm a tih thu  a sawi a, a bul tantute fakawm a tih thu leh CM-in phur taka hma a lakpuina rah chhuah a ni a, zirlaite pawh thahnemngai taka zira enkawl turin a chah bawk a ni.