ZALEN, Oct. 9, 2024: BJP Mizoram chuan October, 2023 daih tawha khelmual tihchangtlun nana central atanga sum pek tawh chu Mizoram sorkarin a la hup bet nia sawiin pe chhuak turin an phut a. Hmalakna a awm lo a nih chuan a mawhphurtu puan an tum tih an sawi.

Nilainia thuchhuah an siamah BJP Mizoram chuan Mizorama club hlun, Aizawl Football Club (AFC) rawtna anga sawrkar laipuiin Power Finance Corporation (PFC) kaltlanga N.Lunglenga khelmuala phullem phah nan Rs nuai 546.90 a pek chu October 11, 2023 daih tawha hna tan turin inremna ziah tawh ni si, vawiin thlenga hna tan theih loha awm chu pawi an tih thu an tar lang.

Project hi withdraw emaw, cancel emaw thei dinhmunah a ding tawh nia sawiin PFC pawhin Mizoram State Sports Council (MSSC)-ah na takin lehkha a thawn tawh niin an sawi a. “Chuvangin, he project tihkhawtlai chhan hi party politics tenawm tak vang ni ngeiin kan hria,” an ti.

“Mizoram hmasawnna tur atana sum awm sa lapse thin hi a pawi avangin BJP Mizoram chuan PFC CSR Fund pawh hi AFC-in an chân loh nan theihtawp kan chhuahpui dawn a ni,” an ti.

Central atanga thalaite hmakhua ngaia hmalakna hi a khaihlak a nih chuan nakin zelah hetiang hi chân zel a hlauhawm nia sawiin Mizoram sawrkar chuan ngun taka ngaihtuaha field tihchangtlunna tur chu a rang thei ang bera tihfelsak turin sawrkar leh sport minister chu an ngen tih BJP chuan an sawi bawk.