Italy hmar lam, Emilia Romagna region-a thla hmasaa tui lian nasa tak avang khan Formula 1 Emilia Romagna Grand Prix chu thulh a lo ni tawh a. Tunah hian khuarel chhiatnain lirthei intlansiak ngaihhlut hi a tiderthawng leh mek a, kaltlangpui erawh tum a la ni.

Canada-a Quebec province-a ram kang nasa tak khuin North America khawpui liante a tuam mek a, mihring hriselna atana tha lo khawp boruak thianghlim lo a zâm vel mek a. Thlalak hmuh theihah pawh khua a sen chûk reng.

Karlehah hian Canadian Grand Prix chu Montreal khawpuiah neih a ni dawn a, an boruak tawn mek thlirin an dinhmun a derthawng a; mahse, tun thleng chuan ‘a la hlauhawm rih loh’ tiin F1 hotute chuan an sawi a, intlansiak a awm theih an beisei.

Montreal intlansiak neihna tur province, Quebec hi tuna America ram hmar lam tuamtu meikhu chhuahna bulpui ber a ni a. F1 chuan, “Montreal boruak hi Canada leh US hmun dangte nen a inang lo,” tiin an sawi a ni.

“Hlauhawm a nasa lo va, Montreal-ah hian boruak pawh a him chin a ni,” an ti bawk.

Meikhu zam nasa lutuk avanga boruak a thianghlim loh em avangin mi maktaduai tel chu pawn an chhuahah N95 mask hmang tura ngen an ni a. US-a New York-ah phei chuan Ningani atang hian a thlawnin an sem tan.

New York bakah hian khawchhak lam tuipui kam chin zawng chu boruak thianghlim lo hian a tuam mek a, a zâm thui zel bawk.

F1 hotuten intlansiak neihna hmun chu him rih angin sawi mah se a hun tak a la hlat rih deuh avangin boruak an thlir reng dawn tih an sawi.

Italy-ah khan May 2-3 chhunga ruah a sur avanga tui a len khan Imola-a intlansiak chu thulh a ngaih loh tur thu an puang a; mahse, May 16-17 chhunga ruah sur lehin a tihlen thar leh hnuah kaltlangpui ngaihna a awm ta lo va, an thulh thu an puang zui.

Montreal khawpui chuan hnuai epa awm, St Lawrence Seaway thliarkara Ile Notre-Dame-a neih tur Canadian Grand Prix pawh hi boruak la ngaihchan reng an tum a ni.