ZALEN February 5, 2026: LBS Motors LLP chuan vawiin khan Baptist Centre, Falkland-ah a rualin Kia car pahnih Seltos thar leh Carens Clavis Electric Vehicle an tlangzarh.

Transport Department Director Er Lalrammawia'n Carens Clavis EV chu 'mawi taka siam a ni a, a duh apiang lei theih turin' a khuh hawng a. Home Department joint Secretary PC Lalduhthlana chuan, a leituten an tluanpui ngei theih nan duhsakna hlanin Seltos thar a khung hawng bawk.

Er Rammawia chuan lirthei zuartute nen englai pawhin an inhre reng a, LBS-in hralh chhuah lamah mai ni lovin a hnu thlenga enkawl zui kawngah fak an hlawh a, fak tlak an nih avangin a fak duh tih sawiin an hnen aṭangin lirthei lei ngam a nihzia a sawi.

Kia-in India ramah August 22, 2019 khan Seltos tlangzarhin car an siam chhuah zinga an hralh theih ber a ni a. January 2026 thlengin India ram bikah 6,00,000 vel an hralh tawh. January 2, 2026 khan a thar tichhuakin Mizoramah thla khat chuang hnuah khuh hawn a ni a, a man tlawm ber Rs 14,95,094 leh a to ber Rs 23,05,157-in a lei chhuah theih.

A hma aiin chhungkaw hman mil tur zawka duan a ni a, India rama car zinga a chhung chei kawnga Kia hming thatna a chhawm nung tha hle a ni.

July 15, 2025 khan India ramah Carens Clavis EV tlangzarh a ni tawh a, LBS Motors-in an khuh hawn ve leh rualin Mizorama Kia electric car an tlangzarh hmasak ber a ni a. Mi pasarih thut theihna niin mi mal mai bakah chhungkaw tana hman theih a ni a, chak taka tlanpui ngam tura siam a ni.

Battery chi hnih a awm a, a tê zawk 42kwh niin 99kw leh 255Nm a pe chhuak thei a. Charge full-in km 404 tlan thei a ni tih ARAI-in a pawmpui a, battery lian zawk 52kwh niin 126kw leh 255Nm a pe chhuak thei a, charge full-in km 490 a tlan thei ve thung.

Mizoramah Carens Clavis EV hi a man tlawm ber Rs 20,14,749 niin a to ber Rs 27,05,294 a ni ve thung a. LBS Kia showroom, Zemabawkah car pahnih hi a duh tan ngaihven theih a ni a, khalh chhin theih a ni bawk.