Manchester City leh Liverpool te chuan season bul tan nan Community Shield an khel dawn a, kumin chu Wembley Stadium-ah nilovin Leicester mual King Power stadium lamah a ni thung ang. FA Community Shield hi season tan tirhah season liam taa Premier League leh FA Cup champion ten an khel thin. PL champion ten FA Cup an chawi kawp chuan pahnihnain an khel mai thin. 

Community Shield hi khawvel khelmual lar Wembley Stadium-ah khel thin a ni a, mahse kumin chu July ni 31 khian Women's European Championship final khelh a nih dawn vangin hman theih a ni dawn lo. Wembly a hman theih dawn loh tih an hriat atangin khawi mual nge an hman dawn tih an buaipui nghal a, King Power, Elland Road, Villa Park, Emirates Stadium leh London Stadium te an en kual hnuah King Power stadium hi an thlang ta a ni. Mihring 32,261 lenna Leicester mualah hian July ni 30 tlai dar 5-ah City leh Liverpool te an inhmachhawn ang.

Foxes chief executive Susan Whelan chuan,"Kan stadium-ah inkhelh duhawm tak kan thleng tur hi thil lawmawm leh ropui tak a ni. Kan club bakah he khawpui tan pawh hian a hlu. Keini tehlul min thawhpui duh hi kan football club ang pawhin FA leh stakeholder te hnenah lawm thu ka sawi duh a ni. Kan muala inkhel tur Manchester City leh Liverpool te hi lawm takin kan lo dawngsawng dawn a ni," a ti.