ZALEN, Nov. 29, 2024: Mizoram Presbyterian Kohhran Hmeichhiate chuan Zirtawpni khan Kohhran Hmeichhe Ni vawi 28-na an hmang a, ‘Sister Lianchhungi chanchin’ an zir bakah intihhlimna hun an hmang.

Kohhran Hmeichhia Ni hi bial leh kohhranah tha an tih angin hmang thin a ni a, thupui erawh inang tlang neiin kuminah hian Sailuti ziah chu an zir a. Kohhran thenkhat chuan tlaiah zanriah an kilho va, inelna an neiha tithate hnenah lawmman an sem bawk.

Kohhran Hmeichhia hi Zosap, Rev. D.E. Jones-a nupui, Catherine Ellen Williams (Pi Zosaphluii)-i’n kum 1904-a a din a ni a. Mizo hmeichhia, a bik takin nute chu Pathian thu hrilhin, kut themthiam leh hriselna lam a zirtir a. Khasi nu, Siniboni-i’n a pui bawk a, a hnuah Bible Women nen thawk hovin kohhran tinah Kohhran Hmeichhia a lo ding ta zel a ni.

Kohhran Hmeichhe Inkhawmpui Lian-in Kohhran Hmeichhe Ni bik neih a rel a, Synod Executive Committee (SEC)-in ‘November thla Zirtawpni hnuhnung ber chu hman ni se’ tia a rel angin kum 1997 atang khan hman tan a ni a, Synod Calendar-ah pawh Synod Ni pawimawh zinga dah a ni.

November thla Zirtawpni hnuhnung ber hman a nih chhan hi Pu Zosaphluia’n a diary-ah Zirtawpniah hmeichhiate chu inkhawm a neihpui thin tih a ziak a. Inkhawm a neihpui tan ni hi sawi lan ni lo mah se January, 1904-a Mizorama a chhuah khan kum tawp lamah chuan bul a tanpui tawh ngei ang tih a rin a ni a. Hei vang hian Mizorama a chhuah kum tawp lam, November thla Zirtawpni hnuhnung ber chu SEC chuan a ni atan hman a rem ti a, kum 1904 chu Kohhran Hmeichhe din tan kumah a pawm nghal bawk.