ZALEN, Oct. 27, 2024: Mizorama kohhrante inzawmkhawmna pawl, Council of Churches in Mizoram (CCM) chu Pathianni chawhma khan Synod Moderator Rev. R.Vanlalnghaka’n a hawng ta a, hruaitu tharte dah ngheh nghal an ni.

Mission Veng Kohhran Biak In, Aizawla Inrinni atanga CCM hawn pual inkhawmpui hman mekah CCM dinna tur ngaihtuahtu, Joint Committee-a chairman ni bawk, Rev. R. Vanlalnghaka chuan, “Tunah hian kan Lalpa Isua Krista, kohhranho lal ber lu ber hmingin, he CCM hi Zoram kohhran hrang hrangte inlungrual tak leh thlarau hmunkhata Lalpa ram tizau tura kan thawhhona ni turin leh Lalpa ropui nan ka hawng e,” a ti a, mipuiin dingin an hriatpui.

Baptist Church of Mizoram (BCM) general secretary ni lai, Joint Committee secretary ni bawk, Rev. Dr. R. Lalbiakliana kaihhruai inkhawmah hian CCM hruaitu atana ruat thar mi pasarihte chu Rev. Dr. H. Remthanga, Joint Committee member-in dah nghetin a la lut bawk.

Lalruatkima, Recording Secretary, Joint Committee-in CCM dinna tura hmalakna leh chanchin tawi a sawi a, Mizoram Chief Minister Lalduhoma leh North East India Christian Council (NEICC) General Secretary Rev. Ramengliana Sailo ten chibai bukna thu an sawi bawk.

CCM hawnna inkhawmah hian Joint Committee-in an sawm angin Mizoram MLA 26, Central YMA President Lalhmachhuana leh kohhran inzawmkhawm a din theih nana a tir bera hmalatu, Mizoram Theological Assoctiation (MTA) hruaitute bakah kohhran hrang hrang member thahnem tak an tel.

Inrinni khan CCM rorel inkhawmpui hmasa ber neih tawh niin hetah hian hruaitu turte tihfel a ni a, budget leh hmachhawp hrang hrangte ngaihtuah an ni a. Rorelah hian member kohhran pariat atangin rorel palai 521 an tel thei.

CCM hawnna inkhawmpui hman mekah hian ‘Kohhran inpumkhatna’ (Joh. 17:11) tih thupui hman niin Pathianni chawhnu leh zanah inkhawm a awm chhunzawm ang.

Thawhtanni zingkarah hian CCM Office chu Synod Conference Centre, Aizawlah Joint Committee chairman-in a hawng zui dawn a. Office hi general secretary-in a thutchilh dawn a ni.

CCM-ah hian Mizorama kohhran pariat an tel mek a, member 3,000 nei chin tana tel theih niin tuna la tel lo kohhrante pawh tel belh zel theih a ni.

CCM HRUAITU THARTE:

President: Rev. Dr. R.Lalbiakliana (BCM)

Vice President: Rev. B.Zazawna Lai (LIKBK) & Rev. Lalrodinpuia LS Nghaling (IKK Bualpui Ng)

Gen. Secretary: Rev. Dr. Lalhmangaiha (MPC)

Jt. Secretary: Rev. T.Salaw (ECM)

Treasurer: Upa R.Lalmalsawma (MPC)

Fin. Secretary: Rev. Jessai L.Neitham (EFCI)