ZALEN June 24, 2025 : Chhandamna Kohhran kum 10 tlin lawmna kal zelah June ni 19 atanga ni 22, 2025 chhung khan Koraput District, Odisha leh Anakapalli District, Andhra Pradesh-a Chhandamna Kohhran (Salvation Church of India) Mission Field-ah te Kohhran kum 10 tlin lawmna leh Crusade neiin hun an hmang.

Crusade-ah hian Odisha Mission Field kum 9 tlinna leh Andhra Pradesh Mission Field kum 7 tlin lawm nghal a ni bawk. Chhandamna Kohhran Revival Speaker, Evan. P.B. Zonunmawii chu speaker niin inkhawm apiangin mamawhtute tan tawngtaina hun a hmang thin a. Mi thahnem takin damna an chang a, Odisha-ah hian ring thar pakhat Rev. Dr. R.Lalsangzuala’n baptisma a chantir a ni.

Tun dinhmunah Odisha-ah hian Kohhran paruk ding tawhin thawktu panga an awm a, Andhra Pradesh-ah hian thawktu pahnih awmin Kohhran pahnih a ding tawh bawk a ni. Odisha-mi pastor pakhat awmin state pahniha Kohhrante hi kaihruaiin rawngbawlna kalpui mek a ni.

Crusade-ah hian Chhandamna Kohhran, Fundamental Baptist Church, Baptist Church of Mizoram leh Salvation Army atangin mi 20 kalin, President Upa Dr.H.Lianzela, Vice President Upa Laltlanthanga leh Upa Lalawmpuia Khiangte, General Secretary & Senior Administrative Officer ten crusade-a fehchhuakte hi an ho a ni.