Aizawl August 19, 2022 : BJP Mizoram Pradesh chuan vawiin August 19, 2022 (Friday) khan BJP Mizoram State Office, Upper Republic ah Political Session an nei a, Vanlalhmuaka, State President-in Party ah mithar lawmluhna leh thusawina hun neiin, PM Scheme mirethei te hamthatna tur te hi Kohhran leh NGO te hian en liam mai mai lovin, an inrawlh a hun tawh hle in a lang, a ti.

Vanlalhmuaka State President chuan thusawiin, "BJP Sorkarna State-ah kuthnathawktute thlai thar chhuah tawih chhia a awm ngai lova, keini ramah erawh chuan kuthathawktu te'n an thawh rah hlawkna an beisei tam tak chu a tawih chhe thung a, 'chu chu tu mawh nge?' Sawrkar mawh a ni. Keini BJP kan Sawrkar erawh chuan kuthnathawktute harsatna sutkian hi kan hmalakna tur a ni dawn a, kan thlai thar dahthatna tur kan siam ang a, kuthnathawktu te'n tuna harsatna an tawh thin hi an tawh lohna turin hma kan la dawn a, Kuthnathawktute tan kawl a êng tawh dawn a ni. Mizorama kan Politician te chuan inthlan hmain mipui hnenah an tih tum an sawi teuh a, nimahsela chu an thusawi chu thawnthu ah chauh an chan tir leh zel thin a ni, hetiang hruaitu hi kan ram hmelma an ni," a ti.

Hmuaka, "Kan ram hi Kristian ram kan intia, 'nimahsela tun hunah hian kan Kristianna chu khawiah nge a awm?' Central Sawrkarin kawngpui tha min pek an tum a, nimahsela keini chuan Compensation Sum buai a kan buai avangin chung kawngpui tha pawh chu laih theih a la ni lo a ni. PM Scheme mirethei te hamthatna tur te hi Kohhran leh NGO te hian en liam mai mai lovin, an inrawlh a hun tawh hle in a lang a ni. State dangah Compensation vangin kawnglaih chungchangah harsatna an neih kan hre lo a, keini Kristian ramah erawh Compensation sum duh vangin hmasawnna kan hmu thei lova, kan ram hmasawnna tur hian Mizoram mi tute pawh hian  mawhphurhna kan nei theuh a ni," a ti bawk.