September 7, 2023; Venghnuai Presbyterian Kohhran (Aizawl) chuan branch KTP Leader hmeichhia an nei mek a, amah chu Pathiana innghat mi, a koa mawhphurhna tla hlen ngei duh thin Nl C. Zonunmawii a ni.

ZALEN-in a biaknaah Nl. C. Zonunmawii chuan, branch KTP Leader chu nih a tum ngai loh chanvo a ni tih a sawi a, chutihrual chuan Pathian remruatna fel tak, a kuta tla a ni tih a pawm avangin lawm takin a pawm tih a sawi.

"Mihring lamah chuan harsatnate kan tawh chang a awm thin; mahse, Pathian rorelnaa innghah chuan a fel vel vek thin a, chu Pathian rorelna leh a remruatna chu pawm mai a ngai thin," Nl C. Zonunmawii chuan a ti.

Venghnuai branch KTP-ah member 500 dawn an awm a, chung mite kaihhruaia an rawngbawlsak chu hmeichhe tan harsat chang awm thin mah se, a OB-puite zarah mualpho loin leader chanvo a chelh thei niin a sawi bawk.

Mizoram puma branch KTP Leader ni mek hmeichhe pathum zinga mi, Nl C. Zonunmawii hi Govt. Mizo Higher Secondary School-ah zirtirtu niin, a awmna veng branch YMA-ah pawh OB lo ni tawh thin niin, Central YMA lamah pawh finance committee-ah member ni mek a ni a, pastor bial KTP-ah Asst. Secy ni mek bawkin, a lawina branch KTP-ah Secy tih loh OB post dang chu a chelh kim vek tawh a ni.

A bible chang duh ber : Thufingte 3:6 'I kawng zawng zawngah amah hre reng la, I kawngte chu a kawhhmuh zel ang che.'