Aizawl June 12, 2023 : Vawiin khan Tuirial Block-II Congress Committee buatsaihin Khawkunga Hall, Bukpui-ah Political Training an nei a, he hun hmanpuitu MPCC President Lalsawta chuan Tuirial Bial chu Candidate ten pawisa tam tak an senna thin a ni, tia politician te leh ram mipuiten an hriat thin dan chu Congress Party-in tihrem an tum tih a sawi. Kohhran duhdana an kal dawn avangin an puih ngei a rin thu a sawi bawk.

MPCC President Lalsawta chuan," ‘Sum ngah ngah hmeltha’ tiin kan ram hi ram hreawmah kan siam leh dawn em ni, a teuh lo mai. Mizoramah ‘Tuirial Bial hi Candidate ten pawisa tam tak an senna a ni’ tiin politician te leh ram mipuite hian an hre tlat a ni. Inthlan hun hi thla 5 chauh a ni tawh a, Sum leh paiah kan insum thei a ni. Tuirial Bial an sawi chhiatna hi Congress Party hian tih reh kan tum a, Candidate te sum sen tlemna bialah siam kan tum a ni. Vawiina kan sual tum, inthlanna sum hman tlem hi kan hneh ngei tur a ni. Hei hi Kohhran leh MPF te duhdan a ni a. Pathian leh a Kohhrante duhdan anga kan kal dawn avangin anni pawhin min pui ngei ang," a ti.

Lalsawta chuan sawrkar tha pawimawhna chungchang sawiin, "Ram tana thawk an nih avangin Minister te leh MLA te chu lo rethei deuh mai rawh se, an rawngbawl sak tur mipuite hi hausa tur chu an ni. Tang Puihna leh Sawrkar tha hmangin kuthnathawktute kan chawi chhuak dawn. Ram leh mipuite hmang hian kan ram hi hmasawn tir kan tum a ni. Mi thil chik miten Congress Party an rawn zir a, rin tlak a ni, tiin June thla chhung hian inlawmluh runpui kan nei dawn a ni, a ti.

MPCC Treasurer Dr. Lalmalsawma Nghaka pawhin thu sawiin, "Tang Puihna hmangin kuthnathawktute dinhmun chawikang turin kan inbuatsaih mek a. Mizoram hi siam danglam kan tum a ni. Congress Party hian sawrkar tha kan siam tur hi mipui nawlpuiin chu sawrkar tha chu an chhawr dawn. Tuna kan sawrkar hrawn mek erawh mi tlemte bakin an chhawr lo. Mipui nawlpui ban phak, miretheite khaichhuaktu tur sawrkar hi Pu Lalsawta hova din kan tum a ni," a ti.