Aizawl: Kolasib District Child Welfare Committee chuan nikum chhung khan thubuai an ngaihtuah atangin case 100 an chingfel a, Juvenile Justice Board te pawhin case 30 an chingfel.

District Child Protection Officer Laltlanmawii sawi danin CWC te hian 2020 khan case thar 91 dawngin case hlui 12 an neih nen an ngaihtuah a, heng atang hian case 100 an chinfel laiin chinfel hman lo 3 chu kumin January-a ngaihtuah turin an dah. CWC case dawn zingah naupang inchuh thubuai tam berin 29 zet a awm a, naupang khuaikhem leh an zahmawna tihbawrhban tawk hmeichhe naupang 14 zet awmin kum 11-14 an tam ber a ni. Naupang tihduhdah 9 awmin mipa naupang 5 chu correcting fluid hnim thin, kum 11-18 inkar an ni a, nu leh pa ruihhloa fihlim lo 5 zingah hmeichhia 2 te chu kum 10 hnuai ve ve an nih bakah mahni in atanga tlanbo te, HIV kai te, rethei lutuk chhungkuaa awm te leh naupang enkawl that loh chungchang te chu an case langsar a ni.

CWC in an case dawn hrang hrangah hian home-a dah naupang 11 awmin naupang inchuh thubuai, court lama thawn leh counselling pek 4 ve ve an awm a, nu leh pa warining pek 3 an awm bakah case an chinfelna tam ber thurawn pek 60 an nei a ni. December thla bika an case dawn pahnih te hi naupang khuaikhem chung-chang ve ve a ni bawk.

Nikum chhung vek khan Kolasib JJB chuan case thar 30 an dawng a, a hma kuma an chinfel hman loh case hlui 4 nen an thubuai ngaihtuah atang hian 32 an chingfel a ni. An case ngaihtuah te hi petty offense 6, Serious Offense 18 leh Heinous Offence 6 a ni a, puitling thil tisual nise petty-ah hian kum 3 thleng lungin tan theihna niin serious-ah hi chuan kum 3-7 chhung lungin tan theihna a ni a, Heinous Offence-ah erawh kum 7 chunglam tan theihna a ni thung. Heinous Offence tih lovah hian hmeichhe naupang an inrawlh ve ve a ni.

JJB case dawn te hi IPC bawhchhiatna 25 leh Special & Local Laws (IPC-a tel lo, state sorkarin dan a siam) 5 a ni a, case nei naupang an chhuah te hi bail hmanga release vek niin mipa 6 leh hmeichhia 1 an ni.