ZALEN February 6, 2025 : Kolasib DC Robert C Lalhmangaiha leh Cachar DC Mindal Yadav, IAS, hovin vawiin khan Cachar DC Conference Hall ah inkawmhona an nei a, thawhho dan tur te an sawi bakah Kolasib DC chuan Cachar DC chu Kolasib-a Chapchak Kut hmanpui turin a sawm a, 4 lane laih tur chungchangah meeting neih ho ni se tih te an rel.

He hunah hian a tul anga thawhho dan tur leh inhriatthiam tawnna tha zawk neih theihna atana pawimawh sawiho a ni a. Kolasib DC chuan Mizoram ina VC inthlan an hmachhawn turah ramri leh a chhehvel ah dan leh thupek kenkawhna lamah a tul anga thawhpui turin a sawm a. Inunauna tha zawk a awm theih nan Kumin Chapchar kut lo thleng turah pawh Kolasib a hmanpui turin a sawm nghal a ni.

NHIDCL hmalakna a 4 lane kawngpui laih tur chungchang sawihovin Kolasib-ah meeting neih nise an ti a, state pahnih ramri hnaih a cheng te harsatna an tawh loh nan leh thlamuang taka an awm theih nan Minister level a inbiakna a joint resolution an lo siam tawh chu vawng zel chungin a tul anga thawh dun zel nise an ti bawk. He hunah hian David H Lalthangliana, Kolasib SP pawhin Cachar SP leh a hoten Mizoram Police te kawng hrang hranga an thawhpuina ah lawmthu a sawi a, hun lokal lehzel ah pawh thawhdunpui turin a sawm nghal bawk a ni.

He inkawmhona hi August ni 9, 2024 a State pahnih Home Minister ten Assam leh Mizoram ramri ah inpawhna leh thawhhona tha zawk a awm theih nan, DC leh SP level ah inbiakna neih thin ni rawhse tia an thu dah bawhzuina niin, Cachar district atangin Cachar DC Mindal Yadav, IAS ; Cachar SP N Mahato, APS; Cachar DFO Vijay Palve leh official engemawzat telin, Kolasib atangin Pu Kolasib DC Robert C. Lalhmangaiha ; Kolasib SP David H. Lalthangliana leh Kolasib DIPRO David Lalhmingchhuana te an tel a, Silchar Mizoram House DRC Lalhmingliana'n Silchar atangin a tawiawm bawk a ni.