ZALEN August 7, 2025 : Kawnpui to Sairang NH-06 thawm that hna thawh mekah a chhe nasa lai ber leh khawih harsa lai ber ni a ngaih Zoram Mega Food Park, Khamrang bul kawngpui chu lirthei kal theih tura siam zawh niin Dar 6:00 Pm atang khan lirthei chhuah tan a ni.

Helai kawngpui chhe lai hi metre 100 vel niin chawhnu dar 2:00 thleng khan metre 80 chu boulder a hnawhkhah a ni a, vawiin hian zawhfel vek hman beisei a ni. Excavator 2, Vibratory Roller 1 leh Grader 1 hmanga hna thawh a ni a, kawngpui sir tawn tawnah tuihawk luankawr (side drain) hai a ni bawk ang.

Kawngpui thawm that hna thawktu NHIDCL ten Kawnpui to Sairang road ah One Way-a motor tlan tir an inhuam tawh a, zanin 6:00 atang khan Kolasib atanga Aizawl pan Essential Commodities phur Truck ke ruk nei leh ke sawm nei HMV chhuah an ni a, hun a awm chuan ke 12 nei HMV chhuah an ni leh ang.