Aizawl: Mizo damlo ten an pan nasat Kolkata damdawi inah Health Care a hman theih a, AB-PMJAY erawh hman theih a ni hrih lo a, damdawiin pahnih Medica leh Ruby hospital ten hman an tum mek niin Mizoram State Health Care Society thawktute chuan Zalen an hrilh.

Sawrkarin a kalpui mek Health care-ah hian kum hmasa lama lo kalpui tawh inziahluh man 'premium' Rs. 500, Rs. 750 leh Rs. 1000 te chu Rs. 1000 ah hrutrual a ni tih mai loh chu danglamna a awm lo niin Health care thawktute chuan an sawi a. Mizoram State Health Care sum chu Mizoram sawrkar tum vek a ni tih sawiin sum lamah harsatna a awm an rinloh thu an sawi a. Mizoram State Health Care sum atan hian Mizoram MLA te chuan August 2019 atang khan an hlawhpui atangin 1% chu Health care sum atan hian an chhunglut a ni.

Hetih lai hian sawrkar laipuiin health care scheme thar a kalpui AB-PMJAY-ah chuan a senso hi sawrkar laipui leh state sawrkarin 90:10 in an intumsem dawn a. Mizoram State Health Care Society chuan kalpui mahse third party administrator-ah Media Assist Company te hman an ni dawn a, anni hian bill a dik leh dikloh an enfiah thin dawn a ni. AB-PMJAY sum hi thehluh atanga ni 15 chhungin tihfel vek hman tum a ni. Mizoram State Health Care ah hian natna zawng zawng deuhthaw a huam a, hun hmasa lama bill theih loh zu leh a kaihhnawih pawh a huam dawn bakah OPD thenkhat pawh a huam tel dawn a ni.

Mizoram State Health Care Society thawktute chuan AB-PMJAY chu sawrkar damdawiin ah chuan a hman theih vek tih an sawi a. Mizoram pawna refer te chu Guwahati leh Shillong ah an tir ber tih sawiin hmundanga kal turte chu an zirchian hnuah an tir chauh tih an sawi a, golden card hi Aizawl Civil hospital, Kulikawn damdawiin, State Referral hospital, Falkawn bakah common service centre-ah te a siamtir theih tih an sawi. AB-PMJAY hi Mizoram chhunga sawrkar damdawiin ah chuan a hman theih vek a, private damdawiin zingah Medaim hospital Champhai, Lairam Christian Medical Centre Lawngtlai, Eye Care Centre leh Nazareth hospital Aizawl-ah te hmantheih a ni bawk. Private hospital ten AB-PMJAY an hman loh chhan hi a package a tha tawk lo nia an hriat vang a ni.

Mizoram State Health Care Scheme kalpui tur hi naktip Thawhlehni hian Vanapa hall-ah Chief Minister Zoramthanga chuan a hawng dawn. MHCS hi kum hmasa lamah chuan Insurance company te nen thawk hovin buaipui a ni thin a, kumthar atang chuan Mizoram State Health Care Society in a kalpui tawh dawn a ni.