-Dr. C. Lalrampana

A KAMKÊUNA: Covid-19 hi chuan  hringnun a van chawk buai hneh tehlul êm! Khawvel khawii lai hmunah  mah hian nunphung pangngai (normal life) hman theih ni ta rêng rêng lo mai chu aw!  Amah Pu Hawla tihdan takah, “A zung  nen lam phawi chhuaha han  pho ro vek theih ni se’ng chuan nunphung panngaiah kan letleh mai tur le!” Mahse, chutiang chu a ni thei hauh si lo; chuti ahnehin hripui thawh thumna  bakah Covid-19 hri inthlak danglam thar ber, Omicron pawh Oct 2, 2021 khan Karnaka-ah mi pahnih hmuhchhuah a nileh nghal pang kha a ni a, tunah phei chuan omicron hrivei sang chuang fe an awmleh ta. Nunphung pangngaia khawsak chu a la hlat hmel hle mai!" Mahse, a taka kan tawn a ni miau bawk si. Insaipuka han invaupum chiama sawt chi lah a ni deer si lo.

KAN NGHAHFAK HUNPUI: Kum tin kumpui lingleta kan nghah fak Isua Krista pianni anga phuahchawp Dec 25 leh Pathian hun ruatte leh Dante tidanglama kumthar phuahchawp January 1 chu kan lo hmang liamleh ta a. Hunpui hlimawm leh nghahlelhawm tak ni mah se nikum leh kum hmasa lama kan vailam dan kher kher kha erawh chu ngaia tap zankhua zak zak an awm kher lo mai thei. Covid-19 hripui nena lungrual taka Biak in leh zãikhawmnna in lamtuala abiling abalanga lãm thaia han heiden rial vel chu nuam kan ti tlang vak lo niin a in lang.      

Lal Nimrod-a’n a thih hnua Ni atanga a mite a kan dante leh a thlarauvin a nupui thihsan vãnlalnu Semiramis-i rawn rãia fapa a hrinsakleh hnuhnawh Tamnuz piancham  kumtin Dec 25-a Rom milembehovin an lawm thin elsên nana entawna AD 336 atanga Kristian kohhran hmasaten Pathian fapa Isua pian ni anga ngaia dãwt tih hre reng chunga tun thlenga kum tin Dec 25 kan hmang thin hi; Rev leh Pastor , evan, kohhran upa leh rawngbãwltu zahawm pui puiin kawrchung suit nawh khawng tle zek zawk ha chunga mahni biak in pulpit theuh atanga Pathian nung leh kohhran mipuiho hmaa Isua pianni ni ni ūk lo pui, timna nei miah lova huai taka dãwt hmanga-

“Vawiin hi chhandamtu nausên Isua Bethlehem bawng in tlawma a lo pianna ni a ni a, hlim takin nãu piang i lãwm ang u,” tia an au piap piap thinte chu hripui lêng avangin duh anga au phurpui chiam a har zo ta!

Chutiang bawkin, Pathian hunbi chhiar dan dik tak Bible kalendara thla khatna Nisan/Abib (anno mundi) ngainëpa, Pope Gregory XIII-in kum 1582AD atanga Gregorian  Calendar a siam chawp van thla fang dê leh tahrik nen inmil thei lo chung chung hmanga Pathian kumthar Nisan/Abib ni 1 pawh ni hlei lo, Rom milem pathian, Janus hming chawia January tia phuah zui tãk, kum tin January ni 1 apianga Rev leh Pastors, evan, kohhran upa leh rawngnãwltu zahawm pui puiten Pathian nung leh kohhranho hmaa dãwt sawi pawisa miah lo va, “Vawiin January 1 hi kumthar ni duhawm tak a ni a, dam taka Pathianin min han hruai thlengleh ta hi a va lãwmawm êm, theihtawp chhuahin kumthar i lãwm ang u,” tia ring tak taka an ãu piap piap thinte pawh chu hripui avangin ãu phūr chiam a har zo ta bawk.

JEROBOAMA PRINCIPLE!: Israel hmar lam lal Jeroboama-I khan kum 22 chhung c. 931 – 910 BC ro a rel a. A pa hi Nebat a ni a, a nu hi Zeruah a ni. A nupui hi Ano niin a fa chu Abijah a ni. Amah hi Ephraim hnam a ni a; Israel hmar lam Tirzah hmunah a boral. Lal hrograng na tak pawisak nei lo, Pathian zah lo tak a ni a, Pathian aiin milembiakna ngaisangtu a ni. Pathian hunbi ruat pawh huaisen taka suan sawt ngat ngam a ni.

Tin, Jeroboama chuan Judai rama kut an neih ang bawkin thla riatna, chu mi thla ni sâwm leh ni nga ni chu kut niah a ruat ve a, maichâmah chuan a han kal a; Bethel-ah chuan a bawng no lem siam hnêna inthawiin chutiang chuan a ti a ni: tin, a siam hmun sâng puithiamte chu Bethel-ah a dah a (1 Lalte 12:32).

Pathian chuan Baibula thla sarihna ethanim@tishrei ni 15-ah a mi Israel fate tan Bãwkte kūt a ruat a; chumi entawn chuan Jeroboama khan thla sarihna ata thla riatna Bul thla ni 15-ah ama thuin Bãwkte kut phuahchawp siamin Pathian kūtni suan danglam tumin a bei nasa hle a, mahse,  a hlawhchham lailet der nia! Kristian Kohhranhote hian Jeroboama hnung kan zui kan zui mek a ni lo maw? Ngatinge milem pathian biak dan entawna thil tul lovah kan inhambuai kum tin mai thin le? Isua pian champha hraitrengna ni leh lawmna kan hmang duh a nih pawhin September 11 @ Ethanim 1 Bible code atanga chhut chhuah tal hi hman ãwm tak, ni lo baksak lutuk kan hmang te, Bible kumthar hun ni lo baksak kan hmangte hi a dik tak kan hmang duh a nih rau rau pawhin Pathian hunbi ruat anga thla khatna Abib@Nisan ni 1 emaw hmang ta zawk mai ila Jeroboama principle kan bansan tihna a ni mai tur! Mahse, beramputen khuarkhurum mawngnei lovah an beramte hi min chetsualpui dawn a ni ngei ang.

Hripui lên hmaa hlim taka a biling a balanga, insaipuk chunga khuang tê leh khuangpui chumchilha dãrbenthek leh rimawi, ri thei chi tinreng nena hlim thei ang bera sap pop group-ho khuang ri aia mi hip zawk leh lungkuai zawk, rãl khat hla deuh atang pawha krismas, kumthar zãikhãwm thãwm  hriat phãk ri tluk tluk leh solfa zãi rem thãwm rimawi tak tak hriat tur awm thinte leh veng tina hãr mei khūk leh ruai sa bēl rimtui tak takte leh in tina karawl thawmte lah khriat tur awm tawh lovin hripui avangin a zūzi (lapsed) zo vek a, a reh thuap ta mai chu a ni a; a lunglênthlak danglam duh ve fū mai!

FIMKHUR A HUN E!: Tu huat atan emaw, tu kohhran mal bil bik emaw sawiselna vang ni lovin Pathian hian rorelna dik tak (justice) rawn hmangin À rawn kengkawh ngei dawn a; chutih hunah chuan - A fapa pianni ni lo pui a pian ni anga lo sawi piap piap te, leh kumthar ni lo pui kumthar anga lo puan khawl khawlte hi Pathianin rorelna dik (justice) a kalpui tak tak dawn a nih chuan phat hulna tur a vãng  ngawtin a rinrawm. Eng ni pawh Krismas leh kumthar atan emaw lo hmang pawh ni ta ila, pulpitah dãwt sawi zui nan hmang kher ta lo ila a engthãwl thlak deuh tur. Mahse, hre reng chungin dãwt kan sawi talh thin a nih hmel hle mai. Dãwt sawi hmangte chu vanram kai lo tur zingah chhiar tel kan ni ngei dawn si a! Hetiang renga dãwt pawh pawisa lova kan khawsa chho zel a nih chuan Pathianin kan chunga ro A rêl hunah chuan inchhir a sãwt dawn tawh si lo. Chuvangin, mitinte hian kan nitin nun dan hi fimkhurpui hle ila takna leh dikna nen Pathian ring tlat chungin hma lam i pan zel  ang u.  Kumin 2022 atang chuan Krismas leh Kumthar a zūzi tawh lo turah ngai ila. Hlim taka hripui lên hmaa krismas leh kumthar kan hman thin ang khan kum tin hman leh theih kan beisei theuh tawh ngei ang. Krismas leh kumthar chauh lo pawh Kohhran ni pawimawh chi hrang hrang pawh hripui lêng mêk avangin a khaihlak zo vek a, hengte pawh hi a pangngaia chhunzawm leh theih beisei ila. Khawvêl leh India rama sakhaw hrang hrang betute pawhin an sakhaw kūt ni ropui leh ni pawimawhte duh angin an hmang thei lo tlang vek a, hripui lengin intluktlanna ruamah min hnūk lut a, Seol thihna thlan khur thimah mi tam tak hnūk liamin khawvel hringnun a sawpzi chiang hle mai!

A TLÃNGKAWMNA: Kum 2021 Krismas leh kumthar an her liam, duhthusam lo deuhin kan nawr liam lo thei lo; hripui nunrawng vang a ni. Phun phun mah ila inphunlungawi hleih theih a ni lo. Sum leh pai lam accounting ni se’ng chuan Krismas leh Kumthar a lapsed tih tur hialin hman lohin a liam tih theih hialin kan awm tlang ni ta berin a lang. Mizoram khawpui ber Aizawlin hunpui kan hman nawm loh chuan thingtlang lama kan unauho, uar tak leh hlim taka hman tumte pawhin kum liam ta zawngte kha chu an pha tawh lo niin a lang. Chhung tinten kum thar atang chuan rilru thar, thinlung thar puin insangmar thaleh ila, tumruhna  nen a hma aia dinhmun tha zawk dai chho zel thei turin inbuatsaih thar sauh sauh zawk teh ang u.