Aizawl June 11, 2023 : Congress chuan thuchhuah siamin an party atanga KS Thanga ban chungchangah a tih phak tawk leh a tihawm tawk a ti nia an hriat thu an tar lang a, a tul chuan defamation case pawh an file mai theih thu an tar lang.

Congress chuan, “KS Thanga  hi party-ah dinhmun tha a chan lai pawhin Congress party mi mai ni lo, Mizoram mipuiin a mizia chiang taka kan hriat a ni a. Chuvangin, parliamentary secretary leh minister dinhmun hiala hlang kaitu Congress party a chhuahsan tak beih let nana a thuziakte pawh a mizia enin a tihawm tawkah kan ngai a. He thil avang hian kan party mipuite tumah chiai lo turin kan ngen che u a ni,” an ti.

June 9, 2023-a KS Thanga banna lehkhaah thu dik lo leh puhna dik lo (allegation) tam tak a awm, an ti a. Khang thu dik lo leh puhna dik lo te kha kan President zahawm tak tihhminghliau tumna a nih bakah, mawi lo taka Congress party beihna a nih avangin a tul dan angin defamation case file pawh ngaihtuah an tum thu an sawi.