ZALEN March 19, 2025; Land Resources, Soil & Water Conservation Department changtu minister Lalthansanga'n kuhva chin belh loh Mizoram sawrkarin a support lo niin a sawi.

Vawiin assembly budget session zawhna leh chhanna hun a member te zawh belhna chhanga he thu hi sawiin, Lalthansanga chuan, Doner Ministry atanga thu an hmuh angin, India ramah kuhva kan intodelh tawh a, hemi vang hian kuhva chin belh loh ni se tih a nih thu a sawi.

"He thu hi Mizoram pawh hriattir kan ni a, mahse Mizoram sawrkar chuan kuhva chin belh loh kan support lem lo a, vawiin thlengin a duh te chuan an chin belh a, Mizoram state bikah chuan hand holding-ah pawh a tel thei vek," tiin a sawi.