Aizawl November 2, 2022 : MPCC chuan, Mizoram khaw thlang lama Kuhva chingtuten Kuhva tawlhruk a tam vanga ni a ngaih theiha an Kuhva thar an hralh thei lo leh chumi avanga harsatna thleng chho ta te, Mizo leh Mizo inkara inepna hial a thleng ta hi pawi kan ti takzet a. Hei hi Mizoram sawrkar chak loh vang te, ram hruaitu thenkhat leh Kuhva tawlhruknaa inhnamhnawih, Assam sawrkar wanted-te nen inzawmna tha tak an neihin a hrinchhuah a ni tih Mizoram mipuite hian kan hriat a ngai, an ti.

Ram pawn atanga Kuhva rah lakluh leh phurh kual hi dan anga kalpui theih reng a ni a. Dan hnuai kalpui a nih theih nan sawrkarin a duh chuan hma pawh a la thei reng a ni. Amaherawhchu, hetiang lama hmalakna awm chuang si lo, harsatna thleng pawh chinfel tuma hmalakna awm chuang si lo hi Congress Party chuan a hrethiam thei lo. "MNF sawrkarin awmze neia hma a lak theih loh avangin Assam lamin an state chinah harsatna an siam chho ta a, Mizoram tharchhuah Kuhva te pawh tawlhruk thila ngaiin an kaltlang tir phal ta lo a ni. Hei vang hian Mizoram chhung ngeia Kuhva chingtuten harsatna an tawk ta a, an thlai thar Kuhva chu an hralh thei ta lo a. Kuhva phurtu motor neitute nen an inkarah inepna hial a thleng ta a ni," an ti.

Congress chuan, "He thil hian MNF hi rorel zel tlak an ni lo a ni tih leh, dan leh thupek kenkawhna kawnga an hlawhchham a ni tih a tichiang hle a. Loneitute tawrhna pawhin a koh eih zawh loh sawrkar kan nei hi a vanduaithlak takzet a ni. Sawrkar tha chuan a mipuite harsatna a chinfel sak tur a nih laia mipuiin an harsatna chingfel tura hma an lak a ngai ta hi a vanduaithlak kan ti takzet a ni," an ti bawk.

MPCC chuan, Kuhva chungchanga Mizoram harsatna tawhte a rang thei ang bera chingfel turin Mizoram sawrkar kan phut a. Assam sawrkar pawh Mizoram tualchhunga tharchhuah Kuhva phurhna kawngah harsatna siam tawh lo turin kan phut bawk a ni.