Aizawl November 21, 2022 : BJP-in an State Office, Atal Bhawan-a Karthar inhlanna leh Political Session an neih naah State President Vanlalhmuaka chuan Mizoram-in state kan nih hnuah intiamna tipuitling thin hruaitu kan la nei lo, a ti a, Kuhva chungchanga Mizoram sawrkar dinhmun chu Muhil der kaihthawh tum nen a tehkhin.

Vanlalhmuaka chuan, "Mizoram hian politics a tawn hriat ngah aiin mipui hmaa intiamna tipuitling thin hruaitu leh Party kan mamawh zawk. Chutiang chu Mizoram hian state kan nih atangin hmuh tur kan la nei lo. Mipui hmaa intiamna hlen thin Party leh hma la thin Party chu BJP Pu Narendra kaihhruai Party hi a ni a, chu Party chu Mizoramah hian kan sawrkar a ngai a ni," a ti.

Hmuaka chuan Mizoram chhunga kuhva chingtute buaina sawiin, "Mizoram a kuhva chingtute buaina leh harsatna chinfel dan chu Mizoram sawrkar hian a hre lo ni lovin, a chingfel duh loh zawk a ni. Chingfel duh nise chu Burma atanga Kuhva ro kudam, dan lova lak luh Mamit, Kolasib leh Champhai District a mi te hi man vek se la, ni khat thil thu ah Mizorama kuhva chingtute buaina hi chin fel nghal a ni ang. Kuhva chungchanga Mizoram sawrkar dinhmun chu 'Muhil der kaihthawh tum a tho thei lo nen a in ang reng a ni.' Mizoram-in a tih tur a tih loh avangin Kuhva chingtute hian harsatna an tawk mai a ni.  Mawhpuh tur dang an awm lova, a mawhphurtu dik tak chu Mizoram sawrkar hi an ni," a ti.

4-lane compensation chungchang sawiin, Hmuaka chuan. "Revenue leh forest lamah buaina awm vangin ram neituten kawng dangin hnathawh tur an ti khaihlak nasa hle a. He buaina chungchangah pawh hian State sawrkarin a mawh la ngam lovin, mipuite chu kal ngaihna hre lovin a siam a ni ber a. 11.11.2022-a Honble Minister, MoRTH, Govt of India, Pu Gadkari leh CM leh official ho a meeting neihah khan Mizoram-a project work kal mekt e chuan duhthu a sam lovin, State sawrkar in harsatna an siam thu leh harsatna awm te a rang lama chingfel turin a hriattir nghal a. Kawngpui siam chungchangah hna tikhaihlak lo turin state sawrkar chu Pu Gadkari hian meeting-ah hian a hriattir a ni. Compensation chungchanga buaina pawh a rang lam chingfel turin a hriattir bawk a ni," a ti.