Aizawl July 20, 2024 : Vawiin khan MNYF Hrqs hruaitute chuan Bilkhawthlir kuhva chingtute duty post-te, tunhnaia Phaisen venglaia dan lova kuhva rah tawlhruk chheprelh an man chhuahna hmunte, thuneitute'n kuhva rah an man sa bag 5849 bona Vairengte kudam te a hmunah kalin an tlawh.

MNF Thalaite chuan Vairengte IOC veng kuhva Bag 2000 chuang awmna Godown hmuhchhuah tharte an tlawh nghal bawk. MNYF Vice President Lalnunmawia Pautu chuan, "Kuhva ro bag 2000 hmuh chhuah thar leh Vairengte Godown a kuhva bo bang Bag 3786 hi bo tawh lo se MNYF chuan kan duh a ni," tiin, ZPM sawrkar hnuaia kuhva man tawh sa tam tham tak a bo chuan ZPM thuneitute an inrawlh a rinhlelhawm hle a ni a ti.

Bilkhawthlir kuhva chingtu Co-operative Society Chairman chuan, "Kuhva chingtute Hachhek bial te nena kan han tang deuh a, kan han nawr chho hi hma kan sawnin kan hria a. Vairengte leh a chhehvelah khuan Kudam khu awm lo se, thiat vek se. An kuhva tawlh dahna tur an nei lo ang a. Chutiang tur chuan kan Sawrkar hian hma la sela, hma kan sawn ngei ang," a ti bawk.

MNYF Hqrs chuan, "Phaisen Mimal Ina kuhva bag 687 awm hi him lo kan ti a. Kan Sawrkar hi seng hawi vat turin kan ngen nghal bawk a ni," an ti.

"ZPM sawrkarin a duhlo viau nain mi thahnemngaite PIL avanga High Court in dan lova kuhva ro tawlh chungchang CBI chhui tura a dah ta hian High Court-in Mizoram sawrkar a rin zawh loh zia a tilang a, High court thutlukna hi lawmawm kan ti hle a ni," a ti bawk.