Aizawl June 13, 2024 : Mamit Kuhva Chingtu Pawl (MKCP) Executive Committee, June ni 10, 2024 a neih chuan Mizorama Kuthnathawktute thar chhuah Kuhva hralhna chungchanga harsatna awm mek chungchangah thuchhuah an siam a, Kuhva ro tawlh thinte chungah eng pawh thleng se mawh an phurh loh tur thu te an tarlang.

Mizoram Sawrkar in Mizorama thar chhuah Kuhva rah hralhna kawnga harsatna awm mek tih tawp a nih theihna tura, Myanmar (Burma) atanga dan lova Kuhva Ro lo lut thin tihtawp tuma theihtawp chhuaha hma a lakna an thlawp.

Kuthnathawktu ten an thawhrimna rah senga ram Economy chawi kang thei khawpa tam Kuhva thar mek anih lai leh chhim leh hmar, chhak leh thlanga kan chin pun mek laia harsatna thlen thei zawnga ramdang Kuhva ro, dan lova tawlh ru thin te avanga harsatna an tawk chu rapthlak an ti a. Hetiang tih ching man tur an la awm fo te, mahni hlawkna chauh um a, rem leh rem lova Lirthei hmanga phur kual duh kan la awm thin te hi vanduai thlak an ti.

Kuthnathawktute harsatna tawh mek chhanchhuak tura a thim a var pawh thlu lova hma la tu - Hachhek Bial Kuhva Chingtu Co-operative Society, Bilkhawthlir leh Vairengte Kuhva Chingtu Co-operative Society te hmalakna hi an thlawp tlat a, Sawrkar leh dan in a phal loh ti lui tlat tute hian engpawh tawk sela anmahni cho chhuah ah an ngai a. A tawp thlengin an do zel dawn an ti.

Mamit khawpui leh a chhehvel paltlanga dan lova Kuhva ro phurh kual hi an remti lova, man chhuah an nih chuan an chungah engpawh lo thleng sela Kuthnathawktuten mawh an phur loh tur thu an tarlang.

MKCP ah hian chhungkaw Member 300 vel an in ziaklut tawh a, Kuhva hmun hi Tin 1305 vela zau ah chin mek niin Kuhva hi kung 964368 enkawl mek a ni a, kum 2023-2024 chhung khan Kuhva thar hralhna atangin Nuai 60 vel hralh chhuak anga chhut niin harsatna a awm lo a nih chuan Kuhva hralhna hi 2024-2025 chhung hi chuan Nuai 150 vel kai chhoh an beisei a ni.