January 30, 2024; Dan loa Myanmar kuhva rah tawlh thin chu tunhnai thla chanve chhung velin man tur a awm tawh lo. Hei hi Mizoram sawrkarin khauh zawk a hma a lak vang nia ngaih a ni.

ZALEN in a chhinchhiah chinah Mizoram chhung a dan loa tawlh ruk, Myanmar kuhva man hnuhnun ber chu January ni 16, 2024 kha niin, hemi hnu hi chuan dan loa tawlhruk Myanmar kuhva man thawm hriattur a awm chhunzawm tawh rih lo.

"Mizoram ti hmingchhia a, kuthnathawktute harsatna thlen thin tu, heng thil dik lo ti te do hi hun reilote chhung thawh a, chawlhsan leh mai tur a ni lo a; hmalam hunah pawh mipuite leh Dan kengkawhtute theihtawp chhuaha kan thawhho zel a la ngai ngei ang," tiin Home minister K. Sapdanga chuan a lo sawi tawh a, "Kuhva tawlhruk phur motor chhuahtir a awm lo tih pawh ka sawi nawn duh," tiin a lo sawi tawh bawk.

Mizoram Police Subordinate Officers’ Association (MPSOA) hruaitute chuan January 23, Thawhlehni

khan Home minister K Sapdanga a pisaah an kawm a, dan loa thil tawlh ruk chungchanga Chief Minister

leh Home Minister hmalakna chu 100%-a an thlàwp thu an sawi.

Hachhek Bial Kuhva Chingtu Pawl (HBKCP) pawhin 22.1.2024 khan thuchhuah siamin, Myanmar atanga kuha dan loa tawlhruk chungchang a Mizoram sawrkar hmalakna chu an thlawp tih an lo tarlang tawh bawk.