Aizawl January 30, 2023 : Home Department, Mizoram Police, Law & Judicial Department, CYMA, Assam Rifles (AR), Border Security Force (BSF) leh Directorate of Revenue Intelligence (DRI) te nen Task Group on Illegal Arecanut chu Task Group Chairman H. Lalengmawia IAS, Commissioner & Secretary Home Department kaihhruaina hnuaia ram dang atanga kuhva rawn lut khuahkhirh dan tur sawiin an thukhawm.

Meeting-ah hian Myanmar leh khawchhak ram dang atanga danlo a Mizoram, India-a kuhva lut chungchanga hmalakna awm mek te tihchak zual dan tur sawiho a ni. February chhungin District hrang hranga danlo a lakluh kuhva chhekkhawl stocks awm zat khawn khawm zui zel ni se tih rel a ni a. Hetih lai hian danlo a kuhva kudam awm mek chu kudam chawpa kalh (seal) leh dan anga hma lak (legal action) anih theih nan Task Group in Customs Department ah report a thehlut se, February thla chhunga report hmuh belh pawh Customs Department-ah report a ni leh ang tih chu meeting ah hian rel a ni.

Mizoram chhunga checkgate te tun aia chak leh awmze nei zawka an function nan Police in hma an la ang tih te, a theihna leh tul apiangah CYMA-in Branch te kaltlangin Police an tanpui ang tih te, dan lo a kuhva chhekna kudam te awmna LSC/VC pass te kimchang takin DC ten Task Group-in hma an lak zui zel na turin Home Department ah report an pe ang tih pawh rel a ni. Task Group chuan danlo a kuhva sumdawnna ah hian tumah inhnamhnawih lo tur leh inhnamhnawih awm te poh rang taka tawp san turin a hriattir in a ngen a ni.