Aizawl: January ni 16, 2021 atanga pek tan, Covid-19 vaccine chu sawrkar laipui atanga vaccine hmuh that a nih chuan MIzoramah kum khat chhungin pek zawh beisei niin vaccine la tawh damdawi in panpui ngai an awm loh thu dawn a ni.

Zalen-in state immunisation officer Dr. Lalzawmi hnen atanga thu a dawn danin tunah hian a thawh khatna atan Covid buaipuitute chauh hri danna hi pek an ni a, a thawh hnihnaah home department-in frontline worker a tihte hnenah pek leh an ni ang a, a hnuah natna benvawn neite hnenah pe lehin hemi zawh hian mipui nawlpuiah vaccine hi pek a ni dawn tih a sawi.

Dr. Lalzawmi chuan, “Mipuia vaccine pek hun tur hi hriat a la ni lo a, a tahtawlin kan pe zel dawn a. Mahse, kum 18 hnuai lam te, nau pai leh nau pawm bakah natna benvawn nei chu pek a ni hrih dawn lo a ni,” a ti.

Mi thenkhat, vaccine la tura hming pe lut; mahse, vaccine pek an nih loh vanga vuite chuan thil awm dan an hriat fuh tawk loh vang a ni tih sawiin, “Vaccine la tura hming pek lai hian an chanchin dang ziak lovin an hming chauh ziah a ni a. Mahse, nu nau pai leh nau pawm te, BP sang nasa, zunthlum nasa leh damlo mekte chu vaccine hi pek a rem lo a. Heng mite hi vaccine pek an ni dawn lo tihna ni lovin sawrkar laipui duh dan angin an natna a zia hunah vaccine hi pek an ni leh dawn a ni,” a ti.

Covid-19 vaccine chu a him tawk nia sawiin Dr. Lalzawmi chuan, “Covid vaccine hi a him tawkah kan ngai a ni,” a ti a. “Vaccine reng reng hi naupangin an lak pawhin khawsik, awm nuam lo leh tap an awm thin a, puitlingah pawh awm nuam lote an awm bawk. Mizorama Covid vaccine kan pekah harsatna nei emaw, vaccine an lak vanga damdawi in panpui ngai emaw an awm kan la hre lo,” tiin vaccine siamtute an ring tawk tih a sawi.

Covid vaccine hi mi pakhat dose hnih zel pek tur niin dose khatna hi pek a ni tawh a, dose hnihna tur pawh harsatna a awm lo tura ngaih a ni.

Zirtawpni tlai thleng khan Mizoramah Covid-19 vaccine dawng tawh mi 3,657 an awm a, heng te hi Aizawl East-ah 1046, Aizawl West-ah 569, Champhaiah 280, Kolasib 296, Lawng-tlai 361, Lunglei 485, Mamit 203, Serchhip 306 leh Siaha district-ah 111.