Oscar buatsaihtu Academy of Motion Picture Arts and Sciences (AMPAS) chuan thuchhuah siamin, Will Smith chu a chetdan mawi lo tak avang khan kum 10 chhung atan hrem a nih thu an puang. Hetih hun chhung hian Will Smith hian Oscar Award a dawng thei dawn lo a, award ceremony-ah a inlan thei lo bawk ang. 

Kum 53 mi Will Smith hian a chunga hremna puan a nih hma hian Academy atanga a inhnuhdawh thu a lo puang tawh a nih kha. Zirtawpni khan a chungchang hi ngaihtuah a ni a, kum 10 chhung atan an hrem ta a ni. American actor Will Smith hi 94th Academy Award-a a chet dan avang khan a inthiam thei lo a, sawiselna pawh a tawk nasa hle a ni.