Aizawl May 28, 2023 : Kum 2013 atanga kumin 2023 inkar chhungin Mizoram jail hrang hrang atangin tang tlanchhuak mi 49 an awm a, an zinga mi 32 chu man tawh niin, la man loh mi 17 an awm. 

Prison department ASPIO-in ZALEN RTI zawhna a chhan danin kum 2013 atanga kumin 2023 chhungin Central Jail Aizawl atangin tang tlanchhuak mi 11 an awm a, an zinga mi pathum man an ni tawh a, mi pariat man loh an la awm.

La man loh zinga mi palite chu POCSO thubuaia tang an ni a, mi dangte chu 21 (b) ND&PS, 376 (3) IPC, 21 (c) ND&PS Act vanga tang mi pahnihte an ni.

Kum 2022 chung khan District Jail, Aizawl atangin tlanchhuak mi pali awm bawkin, chung mite chu an tlanchhuah atanga darkar 24 ral hmain man leh vek an ni.

District Jail, Lunglei atanga tlanchhuak mi 14 an awm a, chung zinga mi parukte chu man loh an la ni a, mi dang 8-te chu man tawh an ni.

Tun hnai April 19, 2023 zinga tlanchhuak mi pangate zinga pathum chu man tawh niin la man loh pahnih, Vanneihthanga s/o Hrangtawia, Leisen, Myanmar (March 1, 2023 atanga tang) leh Haudeihchin s/o Tualneihthanga, Tlangnuam, Champhai district (November 10, 2023 atanga tang) te man an la ni lo.

Hemi hun chhung vek hian District Jail, Siaha atanga tang tlanchhuak mi 16 an awm bawk a, chung zinga mi 15-te chu man leh vek tawh an ni a, an zinga pakhat POCSO thubuai vanga tang, November 2, 2021-a tlanchhuak, Vanlalliana chu man loh a la ni. 

District Jail, Champhai atanga June 15, 2019-a tlanchhuak pahnih, Vansuiemi leh Ngunchuaii, ND&PS thubuaia tangte chu vawiin thlengin man an la ni lo.

District Jail, Kolasib atangin kum 2017 leh 2018 khan tang tlanchhuak mi pahnih awm bawkin, man ve ve tawh an ni.

TANGTE ENKAWLNA 
Jail hrang hrangte thuam thatna turin 2023-24 state budget-ah Rs. 8,00,000 dah a ni a, modernization of prisons project, MHA atangin Rs. Nuai 300 hmuh a ni.

Jail tangte nun siam thatna tur atan vawk vulh, ar vulh, khuai khawi, furniture industry, puan thui, puantah te kalpui a ni a. An thlarau nun atan jail chhungah kohhran leh mimal hrang hrangin rawngbawlna an nei thin bawk.