January 8, 2023; East Lungdar Venghlun Presbyterian Kohhran a lawi, kum 101 na hmang mek, Pi Nuchhuni chuan kum 1998 atanga nikum 2022 chhung khan kum 17 chhung Sunday School a kai kim thei a, nikum 2022 ah pawh khan Sunday School kai kim lawmman a la dawng.

East Lungdar Venghlun Presbyterian Kohhran a an upa ten ZALEN an hrilh danin, Pi Nuchhuni hi Pathian zarah a hriselna a la tha hle a, a damthat phawt chuan inkhawm hrim hrim a hmaih ngai lo. Nikum September thla beihrual inkhawm pawh kha a kal kim vek a. Tunhnai an biakin kawngkar bul ah a tlusual palh hlauh a, chuti chung chuan tiang hawl in biakin thlen a thulh chuang lo.

Pi Nuchhuni hi a pasal in a boral san hma avangin a fate kilkawi a hun hmang tam em em a ni a, tun dinhmun ah a fapa te ber te nupa leh a tupa nen East Lungdar ah an khawsa a, amah Pi Nuchhuni sawi danin, biakin 5 sak/dinna ah a tel tawh. 

Pi Nuchhuni lawina kohhran hi kum 1995 ah East Lungdar Kohhran atanga indang an ni a, an upa te chuan kum upa tak ni tawh chunga Sunday School la kaikim thei Pi Nuchhuni chu a kohhran ang pawhin an lawmpui hle tih an sawi a, an lawmpui zia lantirna atan kumthar inkhawm hmasa berah 'inkhawm tantu' ah an hmang tih an sawi.