Aizawl: Aizawl City Traffic Police te chuan kum 13 kalta chhung khan lirthei dan bawhchhia 1,30,978 an man a, heng zinga dan bawhchhe tam ber 70045 hi two wheeler an ni.
Zalen palaiin Aizawl City Traffic Police thawktu te hnen atanga thu a dawn danin lirthei dan bawhchhe man 130978 zingah hian two wheeler chu tam lawr lakin dan bawhchhia man zinga 53.47% an hauh phak a. Two wheeler dawtah hian LMV 31233, Taxi 21374, HMV 6042, Bus 2132 leh MMV 152 ten an dawt a ni.
Chhinchhiahna atanga a lan danin kum 2007 atanga 2019 inkar chhung khan lirthei dan bawhchhia te sum chawi tlingkhawm hi Rs. 42,392,667 a tling a. Kum 2015 kha Traffic Police ten lirthei dan bawhchhia an man tam ber kum a niin hemi kum hian 17726 an man a. Kum 2018 in dawtin lirthei 16049 man a ni a, kum 2017 chu man tam lama pathumna niin hemi kum hian lirthei dan bawhchhia 13869 man a ni. Nikum 2019 bikah khan lirthei dan bawhchhia 13125 man a ni a, heng zingah hian two wheeler chu tam berin 8523 man a ni a, hei hi lirthei man zawng zawng atanga chhutin 64.93% a tling hial a ni. Nikum chhung vek hian lirthei dan bawhchhia LMV 3020, Taxi 1169, HMV 327 leh Bus 86 te man an ni a, MMV dan bawhchhia man an awm lo thung.
Kum 2019 chhunga lirthei an man zat hi 13125 ni mahse lirthei thenkhat dan bawhchhia an man nawn te an awm avangin Traffic Police ten dan bawhchhia lirthei sum an chawitir hi tum 15058 a awm thung a. Hei hi a chhan chu lirthei thenkhat vawi khat mai ni lo dan bawhchhia a sum chawitir an awm vang niin Zalen palai an hrilh a. Dan bawhchhiat vanga sum chawitir hi June thla ah tam berin tum 1744 a awm a, January ah tlem berin vawi 897 a awm thung a ni.