ZALEN February 18, 2025 : District Magistrate, Siaha District VL. Hruaizela chuan Bharatiya Nagarik Suraksha Sanita, 2023, Section- 152 in thuneihna min pek angin thuchhuah a siam a, Siaha district huam chhungah kum 18 hnuailam tan Vaihlo kaihnawi bakah E-Cigarette (Vape) hman leh pekchhuah a khap.

District magistrate chuan, "Tunlai hian Siaha District huamchhungah naupang leh theirawl kum tlinglo (kum 18 hnuailam) zingah Vaihlo atanga siam chhuah (Tobacco Products) leh E-Cigarettes (Vape) zu leh hman ching an tam hle a, hei hian mihring hriselna a tichhiain khawtlang/veng mipui mimir tana thil thalo tak mai a ni a. A siamtu Company lam pawhin mihring taksa hriselna atana thalo a nih thu tarlangin chiang takin a kawrah tarlan a ni a. Zirna in (Educational Institution) hrang hrang leh zirlai naupangte'n Tobacco Products leh E-Cigarettes atanga an lo him theih nan leh naupangte leh tleirawlte nun tikhawlotu, kan khawtlang puipunna, Sakhaw Biakin leh khawtlang vawnfaina kawnga harsatna siamtu a nih avangin khapna thupek chhuah tul in ka hria a ni," a ti.

District Magistrate, Siaha District, Siaha hian Bharatiya Nagarik Suraksha Sanita, 2023, Section- 152 in thuneihna min pek angin hetiang hian thupek a chhuah.

1. Siaha District huam chhungah mi tumahin Kum 18 hnuailam te hnenah Tobacco Products leh E-Cigarettes (Vape) an zawrh, kawl, hman emaw pekchhuah khap tlat a ni.

2. Siaha District huam chhungah mi tumahin Zirna in (Educational Institution) atanga 100 meter aia hnaiah Tobacco Products leh E-Cigarettes (Vape) an zawrh, kawl, hman emaw pekchhuah khap tlat a ni.

3. Siaha District huam Chhungah mi tumahin SIKHAR/TIRANGA an zuar, kawl, hman emaw an ei tur a ni lo.

He thupek zawmlo tute chu Bharatiya Nyaya Sanhita, 2023, Section - 223 leh Section - 24 of Cigarettes and other Tobacco Products (Prohibition of Advertisement and Regulations of Trade and Commerce Production, Supply and Distribution) Act, 2015 hmanga hrem an ni ang.

He thupek hian chhuah a nih atanga thla nih chung a huam ang.