Kum 19 chu la naupang tak an ni, Mizo Society-ah phei chuan ei zawng tura beisei pawh an la ni hial 
awm lo e. He Mumbai tlangval erawh hi chuan Rs. 7300 crore zeta hlu company a din hem tawh mai! 

A hming chu Kaivalya Vohra a ni a, kum 2001 khan Mumbai-ah a piang. Mumbai-ah hian school a kal a, 
hemi hnu hian Stanford University, California-ah engineering a zir leh. Tunah chuan company dinin a 
hausakna pawh Rs. 1200 crore zet a ni der tawh!

Kaivalya Vohra hian company a din a, a hming chu Zepto a ni. Zepto hi commercial application niin, 
nitin mamawh thil chi hrang hrangte chu minute rei lo te chhungin mamawhtute hnenah an deliver thin. 
Thei leh thlai atanga electronic bungrua thengin an deliver a, kum khat chhung lekin company lian tak an 
ni hman der. 

Kaivalya Vohra hian kum 17 mi a nih laiin a thianpa Aadit Palicha nen startup an tan a, GoPool an kalpui. 
College an kal laiin Zepto din chu an rilruah a awm leh ta a, a chhan pawh online-a thil chah chuan ni 2/3 
tal nghah a ngai thin tih an hria. Hei aia rang zawk hian delivery chu kalpui theih an ring tlat a, tichuan 
kum 2021 khan Zepto: 10-Min Grocery Delivery chu an din ta a ni. 

Zepto company hian Y Combinator leh Glade Brook Capital te atangin fund $mtd 60 an dawng a, 
khawpui lian tak tak 10-ah an inzar pharh tawh. Hnathawktu pawh 1,000 chuang an chhawr tawh a, hma 
an sawn zel. Kaivalya Vohra pawh tunah chuan ram chhunga millionaire ni thei naupang ber a ni ta hial 
awm e.