September 6, 2022; Kum 2019 atanga kumin 2022 chhungin chief minister leh minister te hman tur lirthei leina atan, Rs. 3,66,16,440 sen a ni tawh a, chung zinga Jeep Compass 2, Rs. 49,79,901 man chu CM support car a tana hman tur a ni.

Vawiin Assembly zawhna leh chhanna hun a Serchhip bialtu MLA Lalduhoma zawhna chhangin General Administration Department (GAD) changtu, chief minister Zoramthanga chuan, kum 2019 ah minister te hman tur Hyundai Verna 11 leh Scorpio 11 lei a ni tih sawiin, motor zawng zawng chu Rs. 316,36,539 man a ni tih a sawi.

Chief minister chuan kum 2019 ah CM support car atan a hman turin Jeep Compass 1 lei a ni tih sawi bawkin, Rs. 25,56,000 man a nih thu leh CM hman atan Renault Duster lei a nih lo tih a sawi. Tun hnaiah CM support car atan Rs. 24,23,901 man, Jeep Compass lei leh a nih thu a sawi bawk.

Zawhna neitu Lalduhoma zawh belhna chhangin chief minister chuan, an sawrkar hlim ah minister te hman tur lirthei te chu an tha tawh lo hle tih sawiin, rawtna awm angin, minister 11 te car leh support car lei a nih thu leh CM motor erawh hman theih naw naw a ngaih a nih vangin lei a ni lo tih a sawi.

Chutiang anga engemawchen an kal hnuah, a motor hman chu a tihtheih ta ngang lo tih sawiin, kawng chhoa nam ngai khawp a nih thu leh rawtna awm angin Jeep Compass lei a nih thu a sawi. "Chumi hnuah support car pakhat, a hmalam a i thlak lo ang u ka tih kha a kal thei ngang ta lo a, lei loh theih a ni ta lo a, chumi a nih vang chuan Jeep Compass bawk lei leh a ni," ti bawkin, "Kan motor kawl pahnih a tira kan thlak ve loh kha a hnu deuh ah thlak a ngai ve ve ta a, chumi thlak na atan chuan Jeep Compass lei a ni," a ti bawk.

"Pakhat zawk chu a kal thei ngang tawh lo a, kan dahtawl titih deuh a, advance in kan book a, pawisa pawh office atangin remchang tur ang advance a hman turin i ti ang u kan ti a, nakin a phalna pek hun a rulh leh turin kan ti ta chuk chuk a ni," chief minister chuan a ti bawk.

• Kum 2019 a minister car lei te:
  Verna 4 - Rs. 47,84,892 (Pakhat Rs. 11,96,223 man)
  Verna 7 - Rs. 83,81,877 (Pakhat Rs. 11,97,411 man)
  Scorpio 11 - Rs. 1,84,69,770 (Pakhat Rs. 16,79,070 man)
• CM support car:
  2019 : Jeep Compass - Rs. 25,56,000
  2022 : Jeep Compass - Rs. 24,23,901