Aizawl: Mizoram Police chuan nikum 2019 chhung khan tualthah thubuai 22 leh tualthah tum thubuai 13 an ziak lut.

Mizoram Police hian nikum chhunga tualthah thubuai an ziah luh zingah hian Aizawl district-ah thubuai ziahluh a tam ber a, 8 ziah luh a ni.

Aizawl hi Mamit leh Champhai chuan dawtin 4 ve ve ziah luh a ni a; Serchhip, Lawngtlai leh Siaha district-ah 2 theuh ziah luh a niin Kolasib leh Lunglei district-ah tualthah thubuai a awm lo thung. Tualthah tum thubuai hi Aizawl district-ah 5, Champhai leh Lunglei-ah 3 ve ve, Mamit leh Serchhipah 1 ve ve awmin Mamit, Kolasib leh Lawngtlaiah a awm lo thung.

Statistical Abstract of Mizoram 2019-in a tar lan danin nikum chhung vek khan Mizoram district hrang hrangah pawngsual thubuai 42 ziah luh a ni a, Aizawl district-ah tam berin 16 a awm a. Kolasib leh Lunglei district-ah 5 ve ve, Mamit, Champhai leh Lawngtlaiah 4 theuh leh Serchhip leh Siaha-ah 2 ve ve a awm a ni.

Nikum chhunga IPC hnuaia thubuai ziah luh zingah hian rukruk thubuai ziah luh chu a sang fal hle a, case 1059 ziah luh niin in rawk thubuai 643 chuan a dawt a ni.