Aizawl: Mizoram sawrkar chuan kum 2020 atanga 2021 inkar chhunga SEDP Board hrang hrangte hman atan nuai 303.94 a ruahman.

Assembly session neih zawh takah MLA pahnih C.Lalsawivunga leh Lalrindika Ralte zawhna intawm ziaka chhangin Finance changtu, Chief Minister Zoramthanga chuan November, 2019 atanga March, 2020 inkar chhunga SEDP Board 15-te tana sum senso zat chu Rs. 2,22,01,100 a ni tih a sawi a. Kum 2020-21 atan Es. 3,03,93,760 ruahman a ni tih a sawi bawk.

Chief Minister chuan board vice chairman-te chu MLA an nih loh chuan thla tin lawmman (honorarium) Rs. 40,000 pek tel an ni tih sawiin board vice chairman zingah MLA ni lo 4 an awm tih a sawi.

Chief Minister chuan SEDP Board hman atan lirthei lei a awm lo niin a sawi a. SEDP Board awm zel dan tur chungchangah ‘board-te hi sawrkarin tul a tih danin chhunzawm zel emaw, tihtawp emaw an ni dawn’ niin a tar lang bawk.