Aizawl February 4, 2024 : Mizoram Police chuan nikum chhung khan thubuai 4,101 an ziak lut a. Thubuai ziah luh zingah hian IPC-ah rukruk thubuai a tam ber a, non IPC-ah ruihhlo kaihhnawih a sang hle bawk.

Mizoram Police hian nikum chhung khan IPC-ah thubuai 3,338 an ziak lut a, heng zinga case 1,247 chu mi rawk (buglary) thubuai niin 1,159 chu rukruk (theft) thubuai a ni a, hemi pahniha thubuai ziah luh zat chu 2,406 niin hei hi nikuma case ziah luh zawng zawng 3,338 atanga chhutin 72.07% a tling a ni.

Case liantham ziah luh zingah tualthah case 25, tualthah tum 18, pawngsual 28, mi rukbo (kidnapping & abduction) panga te ziah luh a ni a. Nikum chhung vek khan lirthei chesuala mihring thihna tum 75 leh chetsualna dang tum 17 a thleng nia chhinchhiah a ni bawk.

Mizoram Police hian nikum chhung vek khan non IPC hnuaiah thubuai 763 an ziaklut bawk a. Non PIC hnuaiah hian ruihhlo kaihhnawih thubuai ziah luh chu a tam hle a, ND&PS Act hnuaiah case 274 leh zu khaihhnawih (prohibition/ MLPC Act) hnuaiah thubuai 289, a vaiin thubuai 563 ziah luh a ni a. Hei hi nikum chhunga non IPC hnuaia thubuai ziah luh zawng zawng atanga chhutin 73.78% a tling a ni.

Non IPC hnuaia thubuai ziah luh zingah POCSO case 119 chu a tam zual a ni bawk a. Non IPC hnuaiah vek hian kum danga thubuai ziah luh zinga langsar vak lo Information Technology Act hnuaiah thubuai 21 ziah luh a niin Arms Act hnuaiah thubuai 29 ziah luh a ni bawk.

Tualthah case bikah kum 2020-ah case 30, 2021-ah 24, 2022-ah 31 leh 2023-ah 25 ziah luh a ni a. Pawngsual thubuaiah kum 2020-ah case 36, 2021-ah 25, 2022-ah 16 leh 2023-ah 28 ziah luh a ni a. Tualthah tum thubuai hi 2020-ah pakua, 2021-ah 19, 2022-ah 19 leh 2023-ah 18 te ziah luh a ni.

BOX

Kum 2020 atanga 2023 chhunga Mizoram Police in thubuai an ziahluh zat

Kum  IPC  Non IPC  Total

2020  1804   513       2317

2021   2486  712      3198

2022   3699   574      4273

2023   3338   763      4101

Total   13889