Tun hnaiah India ramah electric vehicle (EV) a pung chak hle a, kum 2030-ah phei chuan lirthei ke hnih nei hralh chhuah zat atanga 80% lai a tlin theih beisei a ni. 

India sawrkar chuan electric hmang scooter leh bike a tam thei ang ber siam chhuah tumin hma a la mek a, hemi atan hian company te chu sum thahnem tak a tawktar. Hemi kawnga hmalakna atan hian Modi kaihhruai sawrkar chuan lirthei siam chhuaktu company hrang hrangte hnenah sum tam tham tak pek a inhuam a, kum 2030-ah chuan lirthei ke hnih nei hralh chhuah 80% zet chu EV a nih hman beisei a ni.  

Hetih lai hian tun hnai khan Pune-ah Ola electric e-scooter a kang a, hei hian a him tawk lohna a tilangah mi tam takin an ngai. He thil thleng hi a siamchhuaktu company chuan an chhui chian tur thu an sawi. Hetiang a nih mek lai hian a himna kawngah nasa zawka hma la turin Prime Minister Narendra Modi chuan ngenna a chhuah a ni. 

Khawvel pumah petrol leh diesel indaih lohna a nasa chho zel a, hei hi hriain India sawrkar chuan electric hmang lirthei tam zawk siam chhuak turin hma a la a, companyte chu an hmalakna kawngah harsatna an tawh loh nan sum leh paia tanpui a inhuam thu thlengin a tarlang a ni. 

Tun dinhmunah chuan EV hi lirthei awm zat atangin 2% chauh a la awm a, nikum atanga hralh chhuah Ola e-scooter awm hnuah erawh a pung chak hle. Nikum chhung khan Ola hi 1,50,000 vel hralh chhuah a ni a, nakkum March ah chuan maktaduai 1 a kai chhoh hman rin a ni.