Aizawl June 5, 2024 : St. Paul's HSS chuan vawiin khan an zirlai hruaitu tur te lakluhna, Investiture ceremony an school Auditorium ah an hmang a, an zirlai hlui Lalnghinglova Hmar, Minister of State chuan Khuallian (Chief Guest) niin he hun hi a hmanpui.

Investiture hi kumkhat chhunga Zirlaite Hruaitu (House Leaders) te lak luhna inkhawm leh hunserh a ni a, Chief Guest hian House Leaders te lak luhna (Oath Taking) a neih pui hnuin, a zir chhuahna school St. Paul’s-a khuallian anga a kir leh chu a lawmzia a sawi a, zirlaite chu ruihtheih thil laka fihlim turin a chah. Social Welfare leh Tribal Affairs Dept-in kum 2022 a survey a buatsaihah Mizoram chhunga High School leh Higher Secondary zirlaite zinga za-a sawmnga-te chu ruihtheih thil leh vaihlo kaihhnawiha fihlim lo niin he mite hian drugs tih duhna rilru an pu hma a ti a, Mizoram zirlaite zingah ruihtheih thila fihlim lo an awm mek thu a sawi.

Skill development leh entrepreneurship lamah Mizo lehkhathiam ten ngaihtuahna an sen a, sawrkar hna, doctor leh engineer ringawt nih tum lo a, mahnia eizawnna ngelnghet neih tum turin a chah. Zirlaite chu vision mumal tak nei tura fuihin UPSC Civil Service exam pek tumte chu Pawl 9 an nih atanga inbuatsaih turin leh an tum tihlawhtling turin a fuih bawk.