Aizawl: Nikum 2020 khan Mizoram Police te chuan thubuai 2317 an ziaklut a, hei hi kum 5 kalta chhunga thubuai ziahluh tlem ber a ni. Hetih lai hian nikum kha kum 5 kalta chhunga tualthah thubuai ziahluh tam ber kum a ni.

Nikum chhung khan Mizoram Police te chuan IPC hnuaiah thubuai 1804 leh Local and Special law (Non IPC) hnuaiah thubuai 513 an ziak lut a, nikum chhunga thubuai ziahluh zawng zawng hi a vaiin 2317 a ni a. Kum 5 kalta 2016 atanga chhutin nikum kha thubuai ziahluh tlem ber kum a ni.

IPC hnuaiah hian rukruk thubuai ziahluh a tam ber a, thubuai 684 ziahluh a niin hei hi IPC hnuaia thubuai ziahluh atanga chhutin 38% a tling a, inrawk thubuai chu a dawttu niin case 414 ziahluh a ni a, hei hi 30% a tling bawk a ni.

IPC hnuaiah hian nikum chhung khan tualthah thubuai 30 ziahluh a niin hei hi kum 5 kalta chhunga tualthah thubuai ziahluh tam ber kum a ni a. Tualthah thubuai hi kum 2016 ah 28, 2017 ah 20, 2018 ah 22, 2019 22 leh 2020 ah 30 an ziaklut. Nikum ah hian pawngsual thleng erawh kum dang ngaihtuahin a tam lem lo a, Police te chuan nikum khan pawngsual case hi 36 an ziaklut a, pawngsual case hi 2016 ah 26, 2017 ah 25, 2018 ah 53, 2019 ah 43 leh 2020 ah 36 ziahluh a ni.

Local and Special law hnuaiah hian thubuai 513 ziahluh a niin thubuai ziahluh zingah hian zu khapna dan bawhchhia an tam ber. Zu khapna dan (prohibition of MLTP Act) hnuaiah hian thubuai case 254 ziahluh a niin hei hi thubuai ziahluh atanga chhutin 49.51% a ni a, PoCSO case chu a dawttu niin case 126 ziahluh a ni a, thubuai ziahluh atanga chhutin 24.56% niin ND&PS Act hnuaia thubuai 101 (19.68%) chuan a dawt a ni.

Nikum 2020 chhung khan February thla ah case ziahluh tam berin thubuai 258 ziahluh a ni a, April ah thubuai ziahluh tlem berin 137 ziah luh a ni bawk.