Aizawl September 19, 2022: Vawiin khan Durbar Hall, Raj Bhavan-ah Governor Hari Babu Kambhampati chuan “State wide adoption of Pradhan Mantri TB Mukt Bharat Ahiyan” chu a hawng a. He hmalakna hian a tum chu kum 2025 ral hmaa Mizoram atanga Tuberculosis (TB) natna umbo a ni.

Governor chuan TB natna vei ten an damdawi eipui tura chawtha an mawhmawh te an hmuh theih nan mi tlawmngai leh in phal te an mamawh tih a sawi a. TB natna vei te tana nutrition leina tura sum leh pai thawha rawn penchhuak turin ngenna a siam. Governor chuan TB vei mi 20 te tana nutrition leina tur kum 1 atan tumsak dawn tih a puang a. Health Minister Dr R.Lalthangliana pawhin TB vei mi 10 te tana nutrition leina tur kum 1 atan a tumsak dawn bawk a ni. Mizoramah TB vei inenkawl mek mi 1360 an awm a. Heng zingah a tam ber te khawsak harsa an nih avangin tanpuina an mamawh hle tih tarlan a ni.  Tunah hian mi tlawmngai 22 te chuan website link - reports.nikshay.in/FormIO/DonorRegistration ah inziak lutin TB vei te eitur tanpuina (Food Basket) atan thlatin mi pakhat tana Rs 650 – Rs 1000 chhutin an sum leh pai an thawh thin a ni.

Kum 5 chhungin Mizoramah TB natna umbo a nih theih a rin thu Governor Hari Babu Kambhampati chuan a sawi a. He beihrualah hian Sawrkar, NGO te, Kohhran te leh khua leh tui zawng zawngte kan inlungrual a, tha taka kan thawhho erawh a pawimawh takzet a ni, a ti. TB natna chungchangah inzirtirna uar taka kalpui te, he natna vei te thinrik mai lova ngaihsak nachang hriat a tulna te, he natna hi damdawi hmanga enkawl leh damdawi a thlawna dawn a nih chungchang leh TB natna chu kai lo tura inven theih a ni tih kan zavaia kan chian hle a ngai a ni tih a sawi bawk.

Governor chuan TB natna vei te hi eizawnna lamah mi harsa tak tak te an nih avang te leh he natna vei chunga hnahram thawh a harsat avang ten tanpui an ngai tih a sawi a. Taksa tichak tur leh TB damdawi hnathawhpui turin TB vei ten ei leh in tur tha an mamawh bawk si avangin anmahni tanpuina atan Nikshay Mitra Programme kaltlangin pawisa kan thawh a ngai, tiin, Governor chuan, “Thla khat a tan chauh emaw thla engemaw chen chhung, kum khat chhung leh a aia rei pawh website link : reports.nikshay.in/FormIO/DonorRegistration ah lut a rawngbawlna rawn nei theuh turin kan insawm a ni”, a ti. 

Health Minister Dr R Lalthangliana chuan tanrual hi chakna tih Hripui Leng donaah a chiang tawh a, khatiang bawk khan HIV/AIDS dona leh Cancer natna titlem tura Beihrual kawngah Sawrkar, Tlawmngai pawl te leh Kohhran ten theih tawp an chhuah tlang leh mek a. Tunah kum 5 chhungah Mizoram atanga TB Natna umbo tum a ni leh a. He thilah pawh hian kan tanrual a pawimawh hmasa ber a. Kan thawhhona a that a, kan inlungrual phawt chuan kan hlawhtling leh ngei dawn a ni a ti.