ZALEN Sept 4, 2024: A kaptu- hriat loh silaimu in, Mission Vengthlang nu pakhat banah a fuh a, tu kah nge tih Kulikawn police ten an chhui mek.

Thu lakna in a tarlan danin, nimin chhun dar 1 vel khan Rothiangi (73) w/o R. Lalengliana (L) Mission Vengthlang (Dawrkawn) chuan an bathlar thlang lam tlangbanah puan a pho laiin a ban veilam kiu chung lamah, an kawmthlang lam atanga rawn kal nia hriat silaimu in a fuh a, damdawi in lam pan pui a ni.

Rothiangi hian thil puak ri a hriat rualin a ban thip zawk chu na tiin a te thawt a, current kal sual in a man ta emaw a ti phawt a. A ban silaimu luhna atang chuan thisen a chhuak nghal a. Damdawi in lamah xray tih a ni a, silaimu hi a lut thuk lutuk lo tih xray atangin a lang a, doctor ten zai chhuah an han tumin silaimu hi an hmu mai thei lova, xray tih that leh phawt a, a tul ang a zai turin an nghak ta rih a ni.

Silai puak ri hi a awmna piah room a a chhungte awm pawhin an hria a. Silai hi khawi atanga rawn kal nge, eng silai nge tih police lamin an chhui mek.

Kulikawn police station atanga ZALEN thudawn danin, he thil thleng chungchang-ah hian hmalakna an kalpui mek a, he thu ziahlai thleng hi chuan silai hmetpuaktu man an la awm lo a, rinhlelh mai tur pawh an la awm lo.