ZALEN July 8, 2025 : Hnahthial District Aids Prevention and Control Committee chu an thukhawm a, Mizoram pum leh Hnahthial District-a HIV natna kai awm zat dinhmun thlir hona neih niin nikum April thla atanga kumin March thleng khan Hnahthial District-ah HIV natna hrik pai mi sawmpanga (15) hmuhchhuah an nih thu a tarlang. Mizoram pumah HIV hrik kai thar mi 2021 an awm a ti.

April 2024 -March 2025 chhung khan Mizoram pumah HIV hrik kai thar mi 2021 hmuhchhuah niin heng zinga 1330 (66%) chu mipa an ni. Natna kai zingah hian Sex hman vanga kai chu tam berin kai zinga 68.13% (mi 1302) chu mipat hmeichhiatna hman atanga kai an ni a, inchiuna thianghlim lo hman avanga kai hi mi 559 (29.25%) an ni.

HIV hrik kai zinga 88% chu kum 15 atanga kum 59 inkar an nih thu tarlan a ni bawk. Hetih rual hian kum nga liam ta chhung khan Mizoram-ah HIV natna vei thar an tlak hniam thu tarlan niin hei hi Hriau thianghlim inhmantirna - Needle Syringe exchange programme leh condom sem bakah awareness pek that avang te a nih thu tarlan a ni.

Hnahthial District-ah chuan kum 2024-2025 chhung khan HIV hrik pai hmuchhuah thar mi sawmpanga (15) an awm thu tarlan niin heng zinga mi 10 (66%) chu mipa an ni a, sex hman atanga kai hi mi pakua (9) niin inchiuna thianghlim lo hman avanga kai hi mi pali (4) an ni. Kum 35-49 inkar atangin HIV hrik pai hi hmuhchhuah hnem ber an ni.