Kum li chhungin cyber crime case 283 ziak lut || Sum kaihhnawih inbumna a sang filawr
![](https://zalen.s3.ap-south-1.amazonaws.com/images/news/1721475239_fraud-900.jpg)
Aizawl July 21, 2024 : Mizoram Police te chuan kum li kalta chhungin cyber crime thubuai 283 an ziak lut a. Thubuai ziah luh zingah sum kaihhnawih inbumna a sang filawr hle.
ZALEN-in police hnen atanga thu a dawn danin kum 2021 atanga July 16, 2024 inkar chhung khan cyber crime hnuaiah thubuai 283 ziak lutin hemi kaihhnawihah mi 91 man an ni.
Mizoram Police-in cyber thubuai thubuai an ziah luh hi kum 2021-ah case 25, 2022-ah 158, 2023-ah 72 leh January atanga July 16, 2024 thleng case 28 ziah luh a ni.
Police chuan kum li chhung hian chargesheet 75 an thehlut a, tun dinhmunah case chhui lai mek 101 an nei a. Hemi hun chhung vek hian inbumna thubuaia sum an hmuh let chu Rs. 16,56,270 a tling a ni.
Police-ten inbumna case an ziah luh zingah hian sum kaihhnawiha inbumna chu tam berin case 168 ziah luh a ni a, hei hi case ziah luh zawng zawng, 283 atanga chhutin 59.36% a tling a ni.
Sum kaihhnawih inbumna dawtah hian mipat hmeichhiatna lam rawngkai thubuai (sexual harassement) chu a tam leh deuh a ni a, hemi kaihhnawihah hian thubuai 44 ziah luh a ni bawk.
ZALEN zawhna chhangin police hotute chuan, “Fimkhur tura mipui nasa taka kan ngen chungin kan case tam ber hi sum leh pai inbumna case a ni a. Chawhrualin ni tin FIR 20 atanga 30 inkar dawng thin ang kan ni a, hetih rual hian state pawn lam thil (inter state case) a tam avangin chhui a har thei hle a ni,” an ti.
Mi sualten mi an bum dan tlangpui sawiin, “Facebook-ah thian atan sawmin an biak nel hnuah an thil thawn khulna tur pawisa te an dil a, mi tam tak chuan a tak tak emaw tiin sum an thawn a; mahse, hmuh let a har tawh thin a. Hei bakah mi thenkhat an bank account no hrilhte awmin an sum an lo lakchhuaksak a. Sumdawnna thilah thawhpui tur anga insawia sum lo pe te, saruak thlalak thawna chumi hmanga vau leta sum dilte chu a langsar zualte an ni,” tih an sawi bawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024