ZALEN August 10, 2025 : Mizoram sawrkar Higher & Technical Education leh School Education department chuan kum riat chhungin sawrkar hnathawk transfer TA atan Rs. 3,32,12,044 a hmang.

RTI zawhna Higher & Technical Education SPIO-in a chhannaah kum riat kalta kum 2018-19 atanga 2025-26 chhungin transfer TA hi mi 42 hnenah pek niin hetah hian Rs. 30,10,918 sen a ni a. School Education department pawhin kum 2018-19 atanga 2025-26 chhungin mi 437 hnenah Rs. 3,02,01,126 an hmang.

Sawrkar kal ta, MNF sawrkar chhung, kum 2018-19 leh 2022-23 inkarah Higher & Technical Education department-ah transfer TA diltu mi 13 awmin pawisa pek chhuah hi Rs. 9,38,740 a nih laiin ZPM sawrkar hnu, kum 2023-2026 chhungin mi 29-in dilin Rs. 20,72,178 sanction a ni a. MNF aia ZPM sawrkar hnua senso tam zawkna hi Rs. 11,33,438 a tling a ni.  

School Education department-ah pawh MNF sawrkar chhung kum 2018-19 atanga 2022-23 khan transfer TA hi mi 164 hnenah Rs. 1,10,91,158 pek a nih laiin ZPM kaihhruai sawrkar 2023-24 atanga 2025-2026-ah TA claim mi 273 awmin pawisa sanction hi Rs. 1,91,09,968 a awm a. Sawrkar hmasa aia tun sawrkara transfer TA claim tam zawkna hi Rs. 80,18,810 a ni.